Shillong, Naiwieng, 20: Shi hat shitaiew shwa ka jingrakhe ïa ka Seng Kut Snem, ka Seng Khasi Kmie, lyngba ka Rongbiria Committee ka la pynlong ïa ka Rongbiria ha madan Second Ground, SRGT, Polo.
Hashwa ban sdang ïa ka Rongbiria, la kyntiew ïa ka lama jong ka Seng Khasi da u long u Acting President jong ka Seng Khasi Kmie u Rangbah O. Pyngrope bad hadien kane u Rangbah Skor Jala uba long u Chairman jong ki Riewtymmen Riewsan ka Seng Khasi Kmie u la pyndep ïa ka nguh ka dem bad ka jingkren balyngkot na u Rangbah O. Pyngrope bad na u General Secretary jong ka Seng Khasi Kmie u Rangbah Hainess Marbaniang.
Ha ka por janmiet, u Chief Executive Member (CEM) jong ka Khasi Hills Autonomous District Council (KHADC) Bah Pynïaid Sing Syiem u la long kum u Kongsan ryngkat ka jingsynlang jong ki katto katne ki rangbah kiba dei ki dkhot jong ka Jylli Pyrkhat Kam ka Seng Khasi Kmie.
Haba phai sha ki jingïakob, ha ka ïakob siat kaba para marwei, u nam tam ha kane ka kynti u dei u Teibor Warbah na Laitkyrhong, uba wan ba-ar u dei u Bok L. Marshillong na Mawpat bad uba wan ba-lai dei u Hed Nongrum na Deingsong.
Ha jingïakob siat kynhun, ki lahduh ki dei ki shi jur na Wahumlawbah ba la mihkhmat da u Diwan Kharshiing bad u Training Sawkmie, ka kynhun kaba wan ba-ar ka dei ka Umkdait-A ba la mihkhmat da u Olik Jyrwa bad u Wudshed Kharshiing. Katba ka kynhun kaba wan ba-lai dei ki ar kynhun ba la shah rem noh ha ka por ba la ïakhun ïa ka semifinal bad kine ki long Seng Khasi Nongmadan ba la mihkhmat da u Shemborlang Sawkmie bad u Diwansing Rani bad ka kynhun ka Malki ‘A’ ba la mihkhmat da u B. Kharmawphlang bad u Deiborlang Nongsteng.
Ïa ki khusnam la ïarap ban sam lang da u Rgh Rangpher Rynjah, u Rgh P.D Nongrum lem bad u kongsan u Bah Pynïaid Singh Syiem.
Ïa ka jingïakob baroh kawei la pynkut da ka jingpynhiar ïa ka lama ka Seng da u Rgh Wallamphang Roy Vice Presdient Seng Khasi Kmie bad Chairman ka Rongbiria Committee.
Haba kren kum u kongsan, u Bah Pynïaid u pynpaw ba u da sngewkmen shi katdei eh ban ïoh ban ïashim bynta lang ha kane ka lympung ha kaba ka Rongbiria ka dei kaba la hikai da ki longshwa ki manshwa bad kane ka ïai im namarba ka Seng Khasi ka dang pynim ïa kane ka bynta.
U pynpaw ruh kumno ban don ïa ka jingïadei kaba ïajan hapdeng ka District Council bad ka Seng Khasi ha kaba ïadei bad kiba bun ki kam kiba donkam ban ïatreilang na ka bynta ban pynneh pynsah ïa ki riti ki dustur kiba u longshwa manshwa u la hikai.
U Bah Pynïaid u la ong ba kane ka dei kawei ka bynta kaba yn sa shimkhia da ka District Council ïa kaba yn ïatrei lang ym tang mynta lehse manla u snem ha kaba yn pynïaid beit ïa ka rongbiria wat ha kiwei kiwei ki jaka jong ka ri lum Khasi. U la ong ruh ba ka Rongbiria kam da dei eh tang ka jingïashim bynta ha ka jingïasiat khnam, pynban kaba long shibynta ha ka kren ka khana ka dwai ka phirat, ïa kaba ka pynurlong ïa kane ka kam.
