Shillong, Rymphang 15: Ka Directorate of Sport & Youth Affairs jong ka sorkar jylla Meghalaya ryngkat ka jingïatreilang bad ka North Eastern Hills University Shillong bad ka Sport Authority of India hynne ka sngi ka la ïoh ban pynlong ïa ka jingïakop mareh thong kaba 6.5 KM kum shi bynta ka Promotional Activities na bynta ka Khelo India University Games 2024.
La sdang kaweh lama ïa katei ka jingïakop mareh da u Colonel Omkar Singh (retd) Registrar of North Eastern Hills University ha ka jingïadon ryngkatlang u Bah John F Kharshiiing-Working President jong ka Meghalaya State Olympic Association, nangta u Prof. L Kma lem bad kiwei kiwei.
Ki la don kumba 280 ngut ki nongïakop mareh kiba la shimbynta ha ka thup open category ba la kyllumlang kynthei bad shynrang bad ruh kiba la palat ïa ka 50 snem. Ha ka thup ïakop mareh 6.5 Km jong ka open category shynrang, u Dabit Dkhar u la wan ba nyngkong, bud sa u Kangujam Bikram Meitei ha ka kyrdan ba ar, nangta u Rishanmehi Ryngkhlem u la wan ha ka kyrdan ba lai.
Ha ka thup ïakop jong ki kynthei, ka Marqueenless Ramsiej ka la long ka lahduh, bud sa ka Sarojani ha ka kyrdan ba ar bad ka Bandasharai Marwein ha ka kyrdan ba lai. Ha ka Open Category jong kiba la 50 snem shaneng, u Badon Singh Tham (Shynrang) bad ka Ibameri Shulllai (Kynthei) ki la ïoh ban khur ïa ka Consolation Prize.
Haba ai jingkren ha kane ka sngi, na ka liang jong u Colonel Omkar Singh (retd) Registrar of North Eastern Hills University u la pynsngew ïa ka jingdonkam ban kyntiew ïa ki rang bad thei ka thaiñ ban kiew ha ka kam ïalehkai bad ruh ban rung ha ka thup ïakop International stage. U la ong ruh ba ka sorkar ka thmu ban tyngkai bad plielad ïa ki samla ka thaiñ ban aireng sha ki lympung ba kham heh da ka jingkyrmen ban wanrah nam ym tang ïa ka jylla hynrei ïa ka ri ruh kumjuh.
Lyngba kane ka pyni shai ba ka jinglong ba la kloi jong ka Meghalaya ban pynleit jingmut ha ka sports bad ban ai mynsiem ïa ki samla ka thaiñ ban nang pynjanai shuh shuh ïalade ha ki jingïalehkai ba ki mihkhmat.
