Shillong, Jymmang, 06: U Lurshai Nongrang u samla pule ka Seng Khasi College lem bad ka kynhun ka Shillong College, ki la ïoh ba kin rah ïa ka nam kum ki lahduh ha ka rynsan ïakob rwai ba la pynlong da ka Seng Khasi College, kaba long kum shi bynta ka jingrakhe pyndonburom ïa ka Jubili Ksiar jong ka Seng Khasi College kaba la long ha Seng Khasi Higher Secondary School Hall, Jaïaw, Shillong.
Ki don 9 tylli ki College kiba ïashim bynta ha ka jingïakob rwai kynhun katba ha ka jingïakob rwai marwei ki don 12 ngut ki samla.
U Lurshai u la ïoh ban rah ïa ka nam lahduh ha ka ïakob rwai ba para marwei katba ha ka kyrdan kaba ba-ar bad ba-lai ki long ka samla Venetia K. Warshong na ka St Anthony’s College bad ka samla Sweety Mary Lyngba ka St Mary’s College.
Ha ka ïakob rwai kynhun, ka College ba la rah ïa ka nam lahduh dei ka kynhun ki nongrwai jong ka Shillong College, bad ka kynhun kaba wan ba-ar bad ba-lai ki long ka St Edmunds’ College bad ka kynhun jong ka St Mary’s College.
Ki nongbishar ha kane ka sngi ki long u Bah Rudy Wahlang, u Bah Hubert Malngiang bad ka ka Kong Adollerine Sawian.
Ha kane ka jingïakob la ailad ïa ki nong ïashim bynta ba ki lah ban rwai ïa ki jingrwai kaba ki thaw hi, ne kino kino ki jingrwai ba ladep ban thaw da kiwei pat, la ka long ha ka ktien Khasi bad Phareng.
Shuh shuh, ki samla nongïashim bynta, ym tang ba ki pynpaw ïa ka sap ba kinang ba kin rwai, pynban ki da pyni syndon wat ïa ka sap ban thaw hi wat ïa ka jingrwai kaba ki wan ba kin ïakhun ha kane ka jingïakob.
Ka Kong Silbi Passah ka la long ka kongsan ha kane ka sngi ryngkat ka jingsakhi lang jong u President u Bah Banteilang S. Rumnong bad u Principal jong kaSeng Khasi College u Bah W.B Rynjah.
