Mairang, Nohprah 06: Ka Seng HANM Eastern West khasi Hills District ha ka 6 tarik mynta u bnai 2023, ka la pynhap pyrda noh ïa ka Lympung ïalehkai phutbol jong ki kynthei kaba la ai kyrteng ha ka riew ïaleh laitluid kaba dei ka kynthei kaba nyngkong eh ha ka jylla kata ka Phan Nonglait bad ïa kane ka Lympung la buh tip kyrteng kum ka 2nd phan Nonglait Women’s Knockout Football Tournament 2023.
Ka jingïakhun Final ha kane ka sngi ka long hapdeng ka Lumparing SC na East KHASI hills pyrshah ïa ka Ïaipyrshang na Eastern West khasi Hills hapoh ka madan Ïalehkai jong ka shnong Mission Mairang.
Ha kane ka jingïalehkai Kynjatbol phainal la wan ban sakhi lang u President ka HANM Sengkmie u bah Lamphrang Kharbani, nangta u EAC ka Eastern West Khasi Hills District, u Bah L.Myrthong uba la long kum u kongsan nangta u Sordar shnong ka Kynshi Mawrïa u bah Powel sohkhlet ha ka jingïadonlang kiwei de ki nongkitkam ka HANM lem bad ki paidbah kiba la wan ban sakhi ïa kane ka jingïalehkai.
Haba phai sha ka jingïalehkai hapoh madan ka Jingïakhun ban ïoh rah ïa ka nam lahduh ka la long hapdeng ka Lumparing SC pyrshah ïa ka Ïaipyrshang FC.
Ka Jingïakhun ka long kaba itynnad ha kaba la sakhi ba ha ka jingïalehkai ka Lumparing kaba khlain bor bha ha kaba ka Ïaipyrshang kam shym la lah ban ïada na ka jingshah thep kol ha kaba ka Lumparing haduh ba kut ka jingïalehkai ka la lah ban pynliem ïa ka Ïaipyrshang da 3-0 kol.
