Lahduh ka Lion Sports Youth Affairs ha ka ‘Open to All Cricket Tournament 2023’ ka West Jaintia Hills District Cricket Association
Jowai, Jymmang 14: Ka kynhun ïalehkai Cricket jong ka Lion Sports Youth Affairs kala long ka lahduh ha ka jingïalehkai phainal jong ka ‘Open to All Cricket Tournament 2023’ ba la pynïaid da ka West Jaiñtia Hills District Cricket Association (WJHDCA) Jowai, ha kane ka sngi saitjaiñ ha Madan Khliehtyrshi Mini Stadium.
Ha kane ka jingïakhun phainal na ka liang ka kynhun ïalehkai jong ka Lion Sports Youth Affairs kala jop da 3 wickets ïa ka Efty United XI Mynso.
Haba phai sha ka jingïakhun ïa ka jingkynting pisa la jop daka Efty United XI Mynso kaba la jied ban tied nyngkong, da kaba kamai 177 runs naki 33.2 overs bad hap baroh ki waroh ki wickets, kiba kamai run khambun ki long u Sylvester Mylliempdah 79 runs 78 balls bad u Sanvert Kurkalang 28 runs 22 balls, katba na ka liang ka Lion Sports Youth Affairs kiba ïoh ban khur wickets ki long u Deibormi Rangad 4 wickets na ki 7 overs, u Peterson Lamare 2 wickets na ki 5.2 balls bad u Firstbornson Dkhar 2 wickets na ki 3 overs. Haba wan ban beh ïa ka thong ka Lion Sports Youth Affairs kala lah ban pyndep tang hapoh 28.4 overs da kaba hap 7 wickets bad kamai haduh 181 runs. Kiba kamai run khambun ki long u Nik Dan 58 runs na ki 63 balls, u Peterson Lamare 35 runs na ki 26 balls bad u Firstbornson Dkhar 30 runs na ki 25 balls, katba u nongkawang bol ka Efty United XI Mynso u Sylvester Mylliempdah ula khur 4 wickets na ki 7 overs.
Ha kane ka sngi phainal la wan ban sakhi lang da u kongsan Sidharth Benerjee uba long ruh u President ka Jaiñtia Cement Manu facturers Association, ha ryngkat ka jingdonlang u Kitbok Rymbai Waheh Shnong ka Khliehtyrshi kum u Symbud kongsan. Katba ïa ka jingïalang la pynïaid da u Vice President ma Issaia Muksor bad ki kyntien ai khublei na u Tournament Secretary ma D. Nartiang. La sam ruh ïa ki khusnam sha ki nongjop kiba long kumne ïa ka Man of the Match la ïoh da u Deibormi Rangadiongka Lion Sports Youth Affairs uba la ïoh ruh ïa ka nam Highest wickets takers, Highest runs scorer la ïoh da u Sylvester Mylliempdah ka Efty United XI Mynso, Man of the Tournament la ïoh da u Sylvester Mylliempdah ka Efty United XI Mynso.Ha ka juh ka por la pynkup burom kumjuh ïa ki player kiba la ïoh ban mihkhmat ïa ka jylla bad kumjuh ïa kiba la pyndep ïa ka jingshah hikai ha ka kam umpire bad ka kam scorer.