Khliehriat, Risaw 10: Hadien ka jingujor ejahar pyrshah ïa u Project Director jong ka NHAI, ka ejahar kaba la buh hynnin ka sngi ha ophis jong u Superintendent of Police East Jaiñtia Hills District, ka Khasi Students Union East Jaiñtia Hills District Unit, mynta ka sngi pat lyngba ka jingthoh ka la leit ban pan sa ïa ki kaiphot na u Deputy Commissioner ka East Jaiñtia Hills District, ha kaba ïadei bad ka phang halor ka jingmaramot ka NHAI ïa ka surok National Hoghway-6 ha East Jaiñtia Hills District.
Ka kaiphot ba la pan da ka seng ka long halor ki saw tylli ki mat kiba kynthup ïa ka jingmaramot surok ka NHAI ïa ka surok ha East Jaiñtia Hills District, kata kumba long haduh mynta, ka jingthmu (plan) jong ka NHAI ha kaba ïadei bad ka jingpynbit pynbiang ka NHAI ban maramot ïa ka surok kaba long katkum ka jingbuh por, ki lad ki lynti lane ki jingthmu jong ka NHAI ban pynlong ïa ka surok kaba bit ba biang ban iaid ki kali ha ka por ba ka pyntrei ïa ka kam ban maramot ïa ka surok ba kan nym thut ka leit ka wan jong ki kali ha katei ka surok NH-6.kumjuh ruh ka seng ka pan ïa kino kino ki jingtip lane ki jingpyntip ba thymmai ha kaba ïadei bad kane ka jingmaramot ïa ka surok, khang ba ka seng bad ki paidbah kin sngewthuh bad kin shai.
Na ka liang ka seng, ka la kyntu ïa Deputy Commissioner ba uun kham pynkloi ban pynpoi ïa ki kaiphot sha ka seng, ka seng ka khmih lynti ruh ba u Deputy Commissioner un shim khia ïa kane ka jingkyrpad jong ka seng ha kaba ïadei bad kane ka mat kaba donkam eh ban pynioh pat ïa ka surok kaba bit kaba biang kaban nym buh jingeh ïa ki kali bad ki nongleit nongwan kiba ju iaid lyngba na kane ka surok NH-6.
Shuh shuh ruh lyngba katei ka jingthoh ba la soi da u President KSU East Jaiñtia Hills Disrict Unit, u samla Streamy.N.Suchen bad u Assistant Secretary, u samla Pynshaikupar Dkhar, ka seng ka la ong ruh ba kane kasurok NH-6 ka dei ruh ka surok kaba kongsan kaba pynïasoh bad shibun tylli ki jylla kiba don ha ka thaiñ shtei lam mihngi, kane ka surok ka dei ruh kaba donkam bha ha kaba kyntiew ïa ka khaïi ka pateng.
Ha kajuh ka por ka seng ka pynpaw ruh ka jingsngew khia namar ka jinglong jingman jong ka surok kaba la sniew shaba palat bad ka buh jingma ruh ïa ka jingim briew.
