Ka North Eastern Hills University (NEHU) kam don ha ka jingshong suk mynta, la jan shisnem eiei bad kane ka jingïakhih, ka don ïa ka daw bah, ha kaba ka sorkar India, ka la dei ban peiphang naduh mynno, namar ba katei ka University, kaba pawnam bad kaba rim jong ka thaiñ shatei lammihngi, ka la nang hiar arsut na kawei ka snem sha kawei pat.
Ka NEHU, ka don mynta ha ka kyrdan kaba 101, haba ïa nujor bad kiwei ki University ka India bad katei ka jinghiar ka kyrdan, ka la dei ban plie lad ïa ka sorkar India, ba kan tangon ïa kito kiba peit ïa katei ka University, lada dei ïa ki nongpynïaid, ki nonghikai lane kino kino kiba dei ka daw jong ka jingnang tlor noh jong katei ka tnat pule kaba kongsan bha ha ka jylla.
Hynrei la ïohi, ba ki heh jong ka sorkar India, kim salia satia; hynrei ha ka jaka, ba kin tian bishar ïa ki nonghikai, kiba pynïaid; ki wad daw ïa ki samla pule, kiba ïakhih, ba ki sngew artatien ïa ka lashai jongki, lada kane ka University, ka nang hiar dor na ka por sha ka por.
Wan sa ka NEIGHRIMS bad katei ruh ka dei ka hospital, kaba pawnam bad kaba ïaid beit ïaid ryntih, ha ki phew snem ba ladep bad ba ki samla Khasi, ki ïa ïohlad ban ïa rungkam ha katei ka hospital; hynrei mynta, ki bor pynïaid ki la knieh noh ïa ka bhah ki trai shnong, da kaba ki wan rah ïa ki rynjiw rynjaw ban trei ha ka hospital bad lada ka long ha kane ka dur, ka pyni, ba ka kam jong ka NEIGHRIMS, ka dei ban beh noh pynban ïa ki samla trai shnong, ba kin leit sha Japan, sha Singapore, sha Germany bad sha kiwei kiwei ki ri, katba kin wan kit da kito kiba na Rajasthan, Uttar Pradesh bad kiwei ki jylla, ba kin ïa bam shngiam lut ma ki, ïa ka ïohkam ïohjam ha katei ka hospital.
Ka don sa kawei ka mat, kaba sngew diaw shibun eh ban tip bad kata ka long ba kitei ki ar tylli ki jaka treikam ba kongsan jong ka sorkar India, ki la shah kynnoh, ba ki dei kiba donkti ban wan rah ïa ka jingïapher niam bad ki samla jong ka NEHU, ki kdew shai, ba wat u nonghikai jong katei ka University, u dei uba don bynta bad ka shnat jong ka RSS, lane ka ABVP bad lada ka long kumta, ka long kaba eh shibun eh, ba ngin khmih lynti ïa ka jingshakri jong kitei ki ar tylli ki shnat treikam, lada dei ïa ka shlem jingstad jong ka NEHU, lane ïa ka shlem jingsumar jong ka NEIGHRIMS, haba ka jingmut kaba don ha ki nongïalam, kam dei ïa ka bynta ba la bynshet ha ki, hynrei ka dei na bynta ban tynruh, da ka jingsngew niam pynban.
Kat haduh mynta, ki samla pule, ki don ha ka jingïakhih, lada dei ha NEHU lane ha NEIGHRIMS bad kaba kongsan, ka long ba lada ka dei ban thawdur ïa kitei ki ar tylli ki shnat treikam, ka dei mynta hi, hynrei lada kam dei mynta, ka pyni, ba ki khun samla jong ngi, kin sa nangshah teh mraw, ha ki buit sianti jong ka sorkar India bad kine ki kynhun shitniam, kiba la nang kad arliang ïa ka jaitbynriew Khasi Pnar.
Lada ka ïai bteng ban long kumne ïa kine ki shnat treikam jong ka sorkar Pdeng kiba la wanrah ha kane ka jylla kan wanrah ïa ka jingeh kaba khraw bha ïa ki samla pule kane ka jylla kiba la pyndep ïa ki jingpule bapher bapher bad kan ktah ruh ïa kane ka jylla Meghalaya kaba jur bha ka kyrduh kam kyrduh jam.
Bad lada ka ïai bteng ban long ha kane ka rukom kam don jingmut ban wanrah ïa ki shnat treikam jong ka Sorkar Pdeng sha kane ka jylla Meghalaya lada kim ai jingmyntoi satia ïa ki Samla kiba kyrduh kam ha kane ka jylla.
Kam don jingmut satia ïa ki samla pule kane ka jylla lada ha jylla Meghalaya la jong kim lah ban ïoh kam hynrei kin hap ban leit sha kiwei pat ki ri tang ban pyndap ïa la ka jong ka kpoh kaba thngan.
Ha kaba ïadei bad kane lah ruh ban ong ba ka sorkar ka la pynshlur ïa ki samla pule kiba la pyndep ïa ki jingpule nurse ban leit shakri ïa ki kam jong ki shabar ri katba hapoh jylla la jong kiba bun ki samla kiba aplai ïa ki kam nurse ha NEIGHRIMS kim ïoh lad satia watla ba ki kwah ban trei bad shakri ha la ka jong ka jylla bad kane ka buh ïa u dak jingkylli uba heh bha ba balei ka sorkar kam lah ban tuklar ïa ki kam ba la leh da ki bor pynïaid jong kane ka jaka pule doktor ne ban phah tuklar ha ka sorkar pdeng lyngba ka tnat ka Koit ka Khiah.
