Shillong, Ïaïong 22: U Myntri ka sorkar jylla uba khmih ïa ka tnat Community & Rural Development (C&RD) u Abu Taher Mondal ha ka sngi baar u la ïathuh ba ka la don ka jingkiew bad ka jingkhambha haba ïadei bad ka jingpynïasoh ïa ki job card bad u Aadhaar bad kane ka long na ka bynta ka jingïaid bha ka jingpyntreikam ïa ka Mahatma Gandhi National Rural Employment Guarantee Scheme (MGNREGS) ha ka jylla.
“Ngi la kham pynbha haba nujor ïa kaei kaba la don ha ka snem ba la dep. Ha kawei pat ka liang ngi dang hap ban trei shitom ban kynjoh sha ka 100% ka jingpynïasoh ïa ki job card bad Aadhaar card,” ïathuh u Mondal sha ki lad pathai khubor.
“Namar kata ngi la bthah ïa ki block development officers (BDOs) ban peit ba kiba ïoh myntoi ba kin pynrung kyrteng na ka bynta u Aadhaar bad Aadhaar card bad job card kadei ban sdang,” u la bynrap.
U Myntri u la ïathuh ruh ba kham hashwa kam shym la don ka jingpynlait ïa ka pisa na ka daw jong ka jingbym lah ban pynïasoh ïa ki job card bad u Aadhaar.
“Ngi mad shibun ki jingeh. Kumta ngi la rah ïa kane sha u Myntri Rangbah, uba la thoh sha ka sorkar pdeng ban pynlait ïa ngi. Kumta la pyllait ïa ngi la ar snem mynta da kaba buh ruh ïa ka jingbthah ba hadien kane kan ym don shuh ka jingpynlait na kane ka jingpynïasoh ïa ki job card bad u Aadhaar.”
U la ïathuh ruh ba ki don katto katne ki bill bym lah ban sei namar ki don ki kyrteng jong ki briew bym pat sdang ban pynrung kyrteng Aadhaar.
“Ïa kine ki bills la bat noh bad da ka jingpyrshang kaba ïaibteng ban banjur ïa ka sorkar pdeng, mynta ki la mynjur ban pyllait ïa kito ki bills ha kaba ki don katto katne ki Aadhaar card kiba ym pat sdang, hynrei hadien kane ne nangne shakhmat kin ym pyllait ïa kino kino ki bills lada uno uno u briew um don ïa ka Aadhaar card. Namar kata ngi la bthah ïa ki officer ba dei peit ban khmih ïa kane ka bynta ba kino kino ki bills ba la sei kim dei ban don ïa ki briew ki bym pat pynïasoh ïa ka jop card bad Aadhaar,” ïathuh u Mondal.
