Ladep phah jingthoh sha ka Sorkar ban ai jaka na ka bynta Shillong Campus ka CWSSU

Shillong, K’ Lyngkot 24: U Myntri ka tnat Pule puthi ka sorkar jylla u Rakkam A Sangma ha ka sngi Thohdieng u la pyntip ba ka tnat ka la dep phah ka jingthoh sha ka sorkar na ka bynta ka jingdonkam ban ai jaka ban shna ïa ka Shillong campus jong ka Captain Williamson Sangma State University (CWSSU).
Haba kren sha ki lad pathai khubor u Sangma u la ong ba ka sorkar ka la dep ban pynbna ban buh ïa ka Shillong campus jong ka skulbah ka jylla (state university) bad kane ka kam mynta ka la nang ïaid shakhmat.
Kumba ka long mynta u Myntri u la ïathuh ba ka tnat ka dang wad ïa ka jaka kaba shipor halor kane ka campus ne jaka pule.
“Ngi dang pynkhreh ban wad ïa ka jaka bad kumjuh ruh ka jingpeit ïa ka NIT campus naba la pynkynriah na kane ka jaka hynrei namar ba kadei jong ka NEHU, ngi dang khmih ïa katei ka jaka ba kan long kaba shipor na ka bynta kane ka campus,” ong u Myntri.
U Sangma u la ïathuh ruh da kaba ong, “Ha kaba ïadei pat bad ka jaka kaba long trai pura jong ka campus ha Shillong, ngi dang wad ïa ka jaka. Ngi la thoh sha ka sorkar ha kaba ïadei ka jingdonkam ban pynïoh ïa ka jaka napoh ka tnat Pynroi Sor na ka bynta ban shna ïa ka campus kaba pura ha Shillong.”
Ha kaba ïadei bad ka jingkynnoh ba la shu pynbor ïa ki college ban pynïasoh bad ka state university, u Myntri u la ong ba kane ka jingkylli kam don satia kaba kum kata.
“U Myntri Rangbah ka jylla u la dep ban pynshai ba ka shong hi ha ka jingjied jong ki jaka pule ka jylla la kin pynïasoh ne em bad ka state university,” u la ong.
U la pyntip ruh ba ka university ka la thoh sha baroh ki college ban ïasyllok bad ban rai halor kane ka kam.
U Sangma u la pynkynmaw ruh ba ka jingmut baroh ban wanlang hapoh ka skulbah ka jylla ka dei na ka bynta ka bha ka miat ki samla pule naba ki skulbah ka sorkar pdeng ki don katto katne ki kyndon ba ki donkam ban bud bad don ruh ka por ba ki jaka pule ha ka jylla ki shem jingeh ban bud.
Ïa kane u la pynkynmaw ruh ha kaba ïadei bad ka sorkar jylla ban pan ka jingpyllait na ki eksam Common University Entrance Test (CUET).
“Hynrei kam long kaba bha pat ban pan biang ïa kane ka jingpyllait hynrei hap pat ban wad ïa ka rai kaba neh shyrta. Namar kata kadei beit tang ha ka skulbah ka jylla bad ngin leit ruh katkum ki kyndon jong ka jylla, ka calendar bad haoid ngi hap ruh ban shah pynïaid hapoh ki kyndon jong ka UGC hynrei ha kaba ïadei pat ba ki jingpynrung klas bad kiwei pat ki kam, kin treikam ki kyndon ka jylla,” ong u Sangma.
Haba kylli, u Sangma u la ong ba ki la don katto katne ki college kiba la ai ïa ki application ban pynpaw ïa ka jinglong ba la kloi ban pynïasoh, hynrei hap bud pat ïa ki rukom pynïaid kam.
“Ki don shibun ki rukom pynïaid kam ba dei ban bud bad kane kan shim ïa katto katne ka por. Ka skulbah kan hap ban pynkhreh ïa ki kyndon bad kiwei pat ki rukom pynïaid kam,” u la bynrap.