Nongstoiñ, Rymphang 19: Ki nongïalam ka HSPDP ki la pynlong ïa ka jingïalap election ha Nongriat ha kaba u samla Pynshai Joel Dkhar Joint secretary ka Youth wing central body, u bah Bony Lyngdoh, u bah Sromwell Mawdoh bad ka kong Irin Lyngdoh MLA barim ka Congress kaba la long ruh kum ka Myntri ha ka sorkar jylla ha ki snem ba mynshuwa, ki la wan ban ai ka jingpynshai paitbah na ka bynta ka election.
U samla Pynshai haba ai jingkren ha katei ka sngi, u la ong ba ka HSPDP kum ka seng saiñ pyrthei kaba la rim tam ha ka jylla naduh ba u (L) Maieit Hopingstone Lyngdoh u la seng haduh kin ki sngi, ka ïeng halor ka nongrim ban ïada ïa ka jaitbynriew, ban pynneh pynsah ïa ka riti ka dsutur, ka khyndew ka shyiap bad ba ka ïeng skhem halor ka hok, ka jingshisha bad ka tip briew tip blei.
U la ong ruh ba ka HSPDP ka ïeng skhem ruh ban pyrshah ïa ki kam bamsap, ki kam sniew bad ka da pyrshah haduh katta katta ïa ka jingwanrah jong ka sorkar ïa ka aiñ khalai, ka lynti rel, tih Uranium bad kiwei kiwei ki kam kiba ktah ïa ka im ka ïap jong ka jaitbynrirew.
U bah Sromwell Mawdoh haba ai jingkren ha katei ka sngi, u la ong ba ha kane ka election ban wan ki paitbah ki dei ban pyrkhat janai shuwa ba kin thep ïa ka vote ba kordor jong ki. Namar lada kane ka NPP kan dang jop biang, ki paitbah kin sa ïakynduh ïa ki jingeh kiba kham palat ban ïa kine ki snem kiba la dep, ha kaba ki paidbah ba bun kin sa kylla mraw ha ki kam synshar donbor jong ka bad ki jingïakhih ruh kin nang jur ar shah.
U la pynkynmaw ba ha kine ki san snem ba ki jingïakhih bad ki jingklumar ki jia man la u bnai, ha kaba u la pynkynmaw naduh ka jingïakhih ha them Metor, ka jingshah siat ïa u bah Cheristerfield Thangkhiew, ka jingïakhih ki nonghikai, ki ASHA bad wat ki nongtrei ha ki ophis bapher bapher ka la ktah ïa ki paitbah ha ka jylla baroh kawei. U la ong ba ha ka por ba ka sorkar ka la pynjari ïa ka jingkhang dam ki paitbah kim ïoh lad wat tang ban mih shabar katba ïa ki briew jong ki heh sorkar ym don ba pynwit.
Ka kong Irin haba ai jingkren ha katei ka sngi, ka la ong ba kum ka longkmie kaba la shah jied teng kum ka nongmihkhmat na ka Congress ha ka por ba ka Nongriat ka dan hap hapoh ka Parïong constituency, hynrei hadien ba ka la shah rem ka Congress kam shym ithuh shuh bad kam kheiñ briew shuh ïa ka. Kumta ka la leit ban pynïasnoh bad ka HSPDP kaba dei ruh ka party kaba la seng da u (L) bah Hopingstone Lyngdoh, u ba dei na kajuh ka ïing ka sem.
Ka ong ba la sngewthuh shai ba dei tang ka HSPDP ka party kaba don ïa ki nongrim kiba skhem ban ïada ïa ka jaitbynriew, khamtam eh ha kane ka juk kaba ka jingshah thombor ha kiwei pat ki jaitbynriew ka la nang jur katba nang mih ki sngi.
Ka la ong ruh ba lada ki kyrtong ka HSPDP kin jop khamtam u bah K.P Pangñiang u ba dei u President, kan ym ailad ba un leh shilliang ïano ïano ban kan ym shah ba kin pyndonkam bakla ïa ki lad jingïarap ba ka sorkar ka la mang na ka bynta u paitbah, la ka long ha ki constituency jong ki ne jong kiwei pat.
