‘Kren beiñ ki nongïalam ka NPP ïa ka Congress’

Nongstoiñ, Rymphang 19: Ha ka sngi saitjaiñ u bah R.R.Kharbuli nongïalam jong ka Congress jong ka Rambrai Jyrngam constituency, u la hiar sha ka shnong Nongriat ban pan jingkyrshan na ki paitbah shuwa ban poi ka sngi thep vote.
U bah Kharbuli haba kren ha katei ka sngi, u la ong ba ka Congress kan ym ïatreilang bad ka BJP lano lano ruh la ka long ha ka jylla ne ha ka ri India. Nalor kata u la ong ruh ba ha kine ki sngi u bah Kimfa S.Marbañiang u ju ong ba ka jingleit pynïasoh jong u sha ka NPP, ka dei namar ba ka congress ka la beh seng ïa u, hynrei katei ka jingkren jong u ka dei ka bym don nongrim satia.
U la pynshai ba hadien ba ki san ngut ki MLA ka Congress, ki la leit ban ai ka jingkyrshan ïa ka sorkar MDA kaba la ïadonlang bad ka BJP ka MPCC ka la suspend noh ïa ki bad hadien katto katne bnai ka la pyntip sha ki da ka jingthoh, ba kin wan ai jubab halor ka jingleit kyrshan jong ki ïa ka sorkar MDA.
U la ong ruh ba ka MPCC ka la ïai ap bad khmih lynti ba kitei ki san ngut kin wan ban ai ka jubab, hynrei kim wan mih satia. Kumta la pyntip sha ka AICC kaba dei ka bor pynïaid kaba ha khlieh duh bad ka AICC kam banse ban weng noh ïa ki.
Ha kajuh ka por u bah Kharbuli u la ong ba naduh ba u bah Goldenstar Nonglong, u la wan ban pynïasoh sha ka Congress, ka party ka la tyrwa ba un ïaleh ha kane ka election na Rambrai Jyrngam bad u bah Nonglong ruh u la pdiang.
U la ong ruh ba ha kaba sdang haba ka Congress ka leit ban trei ha Rambrai ban organize ïa ka party, ki nongïalam jong ka NPP ki la kren beiñ haduh katta katta. Pynban katba nang mih ki sngi ki paitbah jong ka thaiñ Rambrai ki la tuid ban wan rung sha ka Congress, katba ka NPP ka la nang hiar arsut.