Lada sahteng biang ka jingpynbeit pud ym tip sa katno phew snem yn shah klun ha ka Assam

0

Ka jingpynbeit ïa u pud u sam hapdeng ka Meghalaya bad ka Assam ka la ïaid shaid shaid namar ïa ka Wat ba Nyngkong la dep pyndep bad ïa ka kaiphod la dep aiti sha ka sorkar pdeng lyngba u Myntri Kam Pohïing ka ri u Amit Shah. Mynta shen tang shu dep thung ïa ki Regional Committee kumba la dep rai da ki ar Myntri Rangbah u Conrad K Sangma bad u Himanta Biswa Sarma ha ka jingïakynduh jongki ha nongbah Guwahati myn ha ka Sngi U Blei 22 tarik Nailar 2022 yn sa sdang ban leit jurip sa sha ki hynriew tylli ki jaka ba dang sah teng kiba kynthup ïa ka Block I bad Block II Psiar, Khanduli, Borduar, Mawtamur, Langpih.
Hooid ha ka Wat kaba nyngkong ka don ka jingbym hun na ki paid khappud namar ki don ki shnong kiba la hap sha Assam hynrei ha kane ka wat kaba ar jongka jingïakren la dep ïa rai lypa naduh kaba sdang ba kin ieh beit ha ki paidbah ba kin jied shano ki kwah ban leit la kin don sha Meghalaya ne sha Assam ruh.
Hooid ha ka jingïakut ban ïa pynbeit ïa u pud u sam hapdeng ki ar jylla naduh kaba sdang la dep rai ba kan don ruh ka jingïashim bad jingïa ai mar kylliang kumta lada don ka jingïa ai bad ïashim ruh hap ban ïa mynjur lang namar ban shu ïoh tang ka Meghalaya kat ïa kaba ka kwah ruh ka bym lah long bad ban shu ïoh tang ka Assam kat ïa kaba ka kwah ruh ka bym lah long hi. Hynrei ban lah ban pynbeit ïa u pud bad lait na ka jingshah klun ha ka Assam donkam ban long ruh kiba ïaishah. Namar lada ym lah ban pynbeit ha kane ka kynti ba ki ar jylla ki la ïa mynjur da kaba ïa sngewthuh jingmut kynmaw sa katno phew snem kane ka kam kan dang ïai sah teng bad ka Assam kaba bun ki bor pulit kan dang ïai kyntur bad ïai klun ïaki jaka puta ka Meghalaya bad ka lah ban poi ba yn sa duh wat ïa ka Byrnihat ruh.
50 snem ki la ïaid ym pat don sorkar ba shim khia kum kane ka sorkar MDA ban leh syndon da ka kam. Nga kynmaw dei tang ha ka por ba long Myntri Rangbah ka jylla da I bah E.K Mawlong ( bam kwai ha dwar U Blei) ba kane ka kam ka la jan poi sha ka jingïabeit namar la sdang ka jingleit jurip bad u Prafulla Kumar Mahanta uba long u Myntri Rangbah ka Assam ha kato ka por hynrei sniewbok noh ba poi noh ka election ha Assam bad u rem noh kumta kane ka kam ka la sahteng haduh mynta.
Ban da dei ba ka Congress ka shim khia, ha ka por ba synshar u Tarun Gagoi kum u Myntri Rangbah ka Assam bad hangne ha jylla da u Dr Mukul Sangma la dei ban lah pynbeit ïa kane ka kam. Hynrei kine ki myntri rangbah ki shu ïa kynduh tang shisien ba ka kam ka la sahkut noh khlem poi shano shano ruh.
Kumta wat la bun kiba beiñ hynrei kane ka sorkar MDA ka la leh ïa kaba dei ban shim khia ban pyndep noh ïa kane ka jingpynbeit pud kaba la sahteng lah slem slem bah.I tynnad ban ïohi ba ha man la ka election MLA dap ki manifesto jong ki seng Saiñ Pyrthei da ka mat ban shim khia ban pynbeit ïa u pud u sam, hynrei tang shu kut ka election wat la ki don ha ka bor ruh ki leh klet kumta shi kumta ka la shim por da ki phew snem mynta.
Kumta kane ka sorkar kam dei ban sngap than ia kaei kaba ym hun lut baroh namar ha kano kano ka kam ruh ym lah ban pynhun lut ïa baroh. Kan don beit ka jingbym hun hangne hangtai hynrei khnang ban suk pat kiba bun ba lang donkam ban pyndep bad pynïaid shakhmat ïa kane ka kam shwa ban poi ka election MLA ha ka jylla.
Namar lada ym lah ban pynbeit shwa ka election kan sah teng biang ka kam namar wei ba la pynbna ïa ka election ym lah shim rai ei ei ruh bad kumta ym tip la ka sorkar ban wan ha ka bor hadien ka election kan bud dien ne em ïa kane ka kam ne kan shu ïeh noh tang ha shiteng lynti. Hynrei lada dang wan phai biang kane ka sorkar te khlem pep kan ïai bud dien hi bad ka sorkar Assam.

Leave A Reply

Your email address will not be published.