Ki stad wad bniah ki la ai jingmut ba ka Vitamin B3 ka lah ban long kata ka atiar kaba thymmai ha ka jingïaleh pyrshah ïa kita ki khñiang jingpang ba shyrkhei kum kata ka MRSA. Ki stad wad bniah jong ka US ki la shem ba ka vitamin B3, ïa kaba la tip ruh kum ka nicotinamide, ka pynkhlaiñ ïa ka bor jong kita ki immune cell (kita ki cell ba ïaleh pyrshah ïa ki khñiang jingpang) na ka bynta ban pynïap ïa kita ki khñiang jingpang Staphylococcus. Kane ka B3 ka kyntiew ruh ïa ka jingdon bad ka bor treikam jong ki neutrophils, kiba long kita ki white blood cells ba pynïap bad bam ïa kita ki khñiang ba don jingma.
Ka jingwad bniah, ha ka Journal of Clinical Investigation, ka lah ban wanrah ïa kata ka jingkylla ba khraw ha ka rukom ai jingsumar, ong u stad na UK. Ia kane ka vitamin B3 la pyrshang ha kita ki briew ba ïoh ïa ki khñiang jingpang Staphylococcal infections, kum kata ka MRSA (Methicillin-resistant Staphylococcus aureus) kaba long kata ka jingpang ba shyrkhei bad lah ruh ban poi shaduh u pud jong u jingïap. Kum kine ki jingïoh pang la shem hapoh ki hospital bad ki jaka ba ri bad sumar ïa ki khyllung khynnah, tangba ki jur bad roi bha ruh hapoh ki phatok, ki shipai bad hapdeng ki riew kilan met.
Ki scientist ki la pyndonkam da kaba ai shibun bha kane ka B3, kham bun ban ïa kaba lah ban ïoh na kita ki jingbam tei met, ha kita ki jingleh test jong ki, ïa kiba la pynlong ha ki mrad bad kumjuh ruh ha ka snam jong u briew. Tangba ki stad wad bniah ki la ong ba wat la katta ruh ym shym la don kano kano ka sakhi ban pyni ba kata ka B3 ba ïoh na ki jingbam bad ki dawai kan lah ban ïada lane sumar ia kita ki jingpang ba ïabit na ki khñiang jingpang. Ki stad wad bniah ki la ong ba ka B3 la ïohi ba ka lah ban pynkylla ïa ki katto katne ki antimicrobial genes, pynkhlaiñ ïa ka bor jong ki immune cell na ka bynta ban pynïap ïa kita ki khñiang jingpang.
U Prof Adrian Gombart jong ka Linus Pauling Institute jong ka Oregon State University, uba don bynta lang ha kane ka jingwad bniah u la ong “Kane ka jingwad bniah ka long kaba myntoi haduh katta katta wat lada ngi dang donkam ban bishar bniah bad pynlong ïa ka jingwad bniah ha u briew. “Ki antibiotics ki dei kita ki dawai baphylla, tangba ki iakynduh ïa ki jingeh na ka por sha ka por na ka daw jong kata ka bor ïaleh pyrshah jong ki khñiang jingpang bapher bapher, khamtam eh kita ki khñiang jingpang Staphylococcus aureus. Kane ka lah ban plie ïa ngi ïa ka lad kaba thymmai ban sumar ïa kita ki jingpang Staph infections kiba lah ban long kiba shyrkhei bha, bad lehse yn lah ruh ban pyndonkam ïa ka ryngkat bad kiwei kiwei pat ki dawai antibiotic ba don mynta”.
U Prof Mark Enright, jong ka University of Bath, u la ong “Ki neutrophils ki dei da shisha kita ki cell ba hakhmat eh ba ïaleh pyrshah ïa ka jingrung khñiang jingpang ha ka snam bad ka jingpyndonkam ïa ka nicotinamide la ïohi ba ka long kaba shngaiñ ïa mynta ban pyndonkam ha u briew ne ki nongpang naba ka dei kaba la dep ïoh laisen lypa.
