Shillong, Jymmang, 09: Ki Executive Members (EM) jong ka Khasi Hills Autonomous District Council (KHADC) hapoh ka jingïalam jong u Bah Rangkynsai Kharbuki, ka Kong Grace Mary Kharpuri, u Bah Jambor War bad u Bah Teibor Pathaw ha ka sngi Palei ki la hiar jurip ïa ka ïew die lang kaba don ha Ïewduh khnang ban pynsngewthuh ïa ki nongkhaïi bad ïa ki nongdie jhur ba ka jingot kilo ïa ki mar rep kam dei ban dang bteng shuh nangne shakhmat.
Ha kane ka jingjurip ba la synran lang da u Syiem jong ka Hima Mylliem u Pa’iem Ainam Manik Syiem lem bad ki Myntri, ki la pynlong ïa ka jingsorjamin ïa ka Ïewduh baroh kawei bad bad ha kajuh ka por ki la ïohlad ban ïakren ruh ïa ki nongrep bad ïa ki nongkhaïi ban pynshai halor ka rai ba la pynmih da ka Ophis jong u Syiem ka Hima Mylliem ha u snem 2019 ba la mana tyngeh ban ot kilo ïa ki mar rep ba la wanrah da ki nongrep na ki shnong bapher bapher ban die ha Ïewduh.
Ka Executive Member kaba peit ïa ka tnat Market ka Kong Grace Mary Kharpuri ha ka jingïakren bad ki lad pathai khubor ka la ong, “ngi la pynsngewthuh ïa ki nongkhaïi bad ïa ki nongrep ba ka jingot kilo ïa ki mar rep kam dei ban dang don shuh nangne shakhmat.”
Ka la ïathuh ba katkum ka hukum ba la pynmih da ka Ophis jong u Syiem ka Hima Mylliem la bthah ba kam dei shuh ban don ka jingot kilo hynrei tang ban shu thew ïa ka jingkhia jong ka byrni bad ka kriah.
“Ngi kyrpad rit ïa ki nongrep bad ïa ki nongkhaïi ba kin ïatreilang da ka jingsngewthuh. Lada don ki ujor, ka jingshah kynnoh ka long ïa ka Hima Mylliem bad ïa ka District Council. Kan pawshai ruh shabar ba ngim leh eiei. Hynrei haba ngi shong hapoh ka Council kam mut ba ngi shu shong kli kti khlem da ka don ka jingsngewkhia hynrei ba ngi don ka jingsngewkhia ba ngi sa wan,” ong ka Kong Grace.
U Bah Rangkynsai Kharbuki uba long u EM ba peit ïa ka tnat Trade haba bynrap u la ong, “nangne shakhmat kam dei ban don shuh jingot kilo. Ïa kane ngin pyntreikam ha baroh ka jylli treikam jong ka Khasi Hills Autonomous District Council. Katba ym pat ïoh ïa ka jingmynjur na u Lat (ïa ka Khasi Hills Autonomous District, Establishment, Management and Control of Market, Act), ka Executive Committee jong ka KHADC kan sa pynmih da ka Executive Order ba kane ka jingot kilo kam dei ban long tang hapoh u pud u sam jong ka Hima Mylliem hynrei kan treikam salonsar ha baroh kawei ka Schedule Area.”
Haba kylli, u Bah Kharbuki u la ïathuh ba la jan baroh ki nongdie madan bar jylla kim don shuh ha Ïewduh ha ki jaka ba la shah kyndang ha ka taïew ba la hiar khynra hapoh ka jingïalam jong u CEM ka KHADC u Bah TW Chyne bad ïathuh ruh ba ha kine ki jaka la shong die jingdie bujli da ki Khasi.
U la ïathuh ruh ba ka District Council ka la bthah ïa ka tnat Enforcement ba kan pynlong ïa ka jingkhynra kaba manla ka por ha baroh ki ïew ha kylleng ka ri Khasi khnang ban khanglad ïa ki bar jylla kiba shong die madan beaiñ khlem ka Trading License.
