Nongstoiñ, K’lyngkot, 30: Ka jingpan tiket jong ka Dr. Fenela Lyngdoh Nonglait na ka Bharatya Janta Party na ka bynta ban ïakhun kum ka kyrtong MP ha ka Election ka ban long ha u bnai Ïaïong ban wan ka la pynlong ïa ki paitbah ka West Khasi Hills ba kin sdang ban phai khmat sha katei ka long kmie ong u bah Syrpailin Sohlang sordar barim jong ka shnong Markasa.
U bah Sohlang haba ïakren bad u nongthohkhubor u la ong ba wat la ka BJP Meghalaya kam shym pat la rai ïano kan ai tiket ban ïakhun ha ka Electipn MP ka ban wan hynrei ka sur na ki paitbah ba bun ba lang na West Khasi hills bad Eastern West Khasi hills ki la peit kliaw sha ka Dr. Fenela namar katei ka long kmie ka la mih madan haduh arsien ban ïa aireng ha ki election MLA kata na Mawthadraishan Constituency ka la ïa khun na ka HSPDP hynrei ka la shah rem noh ha u bah Brolding Nongsiej bad ha ka sien ba ar pat ka la ïakhun na na Nongstoiñ constituency kum ka kyrtong shimet hynrei ka la shah rem biang.
U bah Solang u la ong ruh ba naduh ki bnai ba la dep haba u la ïohi ha ki lad pathaikhubor ba ka Dr. Noinglait ka la pynrung dkhot sha ka BJP bad ka la paw kyrteng ha ka thup jong kiba pan tiket MP u la pyrshang ban ïakynduh ïa ki nongïalam ba hakhmat jong ka HSPDP kiba la kyrshan bor bah ïa ka ha ka sien ba ka ïakhun ïa ka Election MLA na Mawthadraishan bad u la ïakynduh ruh ïa ki paitbah nongkyrshan jong ka ha kaba ki la ong ba lada ka Dr. Nonglait ka ïoh tiket na ka BJP kin ai ka jingkyrshan ba pura .
Utei u rangbah u la ong ruh ba ha ki snem ba la dep ki paitbah kim kwah ban kyrshan ïa ka BJP namar ba ki kynnoh ba ka dei ka party kaba leh beiñ ïa ki Khristan hynrei ha kine ki sngi pat kim sheptieng shuh namar ba ki la ïohi bunsien ha ki lad pathaikhubor ba u Narendra Modi Myntri Rangbahduh ka ri u la pynïajan bha bad ki Khristan bad ka jingkhot jong u Amitshah Myntri ka tnad kam pohïng jong ka sorkar pdeng ïa ki nongïalam jong ki Balang Khristan na Meghalaya sha Delhi ban ïakren bad ïasngewthuh jingmut ha kaba ïadei bad ki jingeh ba ki balang Khrsitan ki ïakynduh ka la nang pynjan shuh shuh ïa ki paitbah ka jylla bad ka BJP.Nalor kata ka jingkular jong u Amitshah ban shah sngewbha na ka bynta ban tei ïa ka ïng jong ka KJP Assembly ha Nongbah Delhi ka dei kawei ka mat kaba la pynlong ïa ki paitbah jong ka West Khasi hills ba kin ym don jingartatien ba ka BJP kan ym leh bein satia ïa ki Khristan.
U la ong ruh ba kawei pat ka jingkwah jong ki paitbah ba ka BJP kan ai tiket ïa ka Dr. Fenela ka dei namar ba katei ka longkmie ka la biang bha ha ka kyrdan pule bad ka la ïoh ruh ïa ka kyrdan Doctor jong ka aiñ bad halor ka jingwad bniah jong ka ïa ka jinglong jingman jong ki Khristan kum ki rit pait.
U la ong ruh ba n ka liang ki paitbah ki la ong ruh ba ka jingleit pynïasoh jong ka DR. Nonglait sha ka BJP ka dei ka kabu ksiar ïa ki paitbah ka jylla namar lada ka jop kum ka MP na ka BJP ka ïoh lad bha ban kren ha Parliament ïa ki mat ki jura ba ka jaitbynriew Khasi Jaiñtia ka don kam la ka long ha kaban pynkhlaiñ shuh shuh ïa ki lad jingïada ïa ki hok jong ka jaitbynriew, ban pynkhlaiñ ïa ki lad jingïada ïa ka jingngeit niam kat kum ka riti synshar jong ka ri bad kiwei kiwei ki mat kiba ka jaitbynriew ka don kam.
Ha kajuh ka por la ïoh ruh ban ïakren bad u bah D.D. Sohphoh u nongïalam ba hakhmat eh jong ka BJP Nongstoñ Mandal ha kaba u la ong ba hadien ba ka kyrteng jong ka Dr.Fenela L.Nonglait ka la paw ha ka thup jong ki nongpan tiket na ka party baroh ki dkhot jong ka BJP Nongstoiñ Madal ki la kmen bha namar ba ki la ju ïohi ha ki lad pathaikhubor ba ki longkmie kiba don ha Parliament kum ka Smtiti Irani, ka Nirajan Sitharaman haba ki ai jingkren ha ka por ba ka long ka Dorbar ki jingkren jong ki longkmie ka aimynsiem haduh katta katta ïa baroh ki dkhot hapoh ïng dorbar.
U la ong ruh ba lada ka Dr.Nonglait kan ïoh tiket na ka BJP bad kan jop ma ka hi kan dei kawei na ki longkmie kiba hakhmat eh ban kren ïa ki jingeh jong ka jylla ha Parliament bad kan long ka jingsarong ïa ki paitbah jong ka Shillong Parliamentary seat ban don ïa ka longkmie kaba nep ki jingmut jingpyrkhat bad kaba don ïa ka jingkitkhlieh na ka bynta jong ki paitbah.
