Lada jop ka NPP na baroh ar ki konstituensi lah thikna ba kin ïoh long Myntri Sorkar: Sanbor

Shillong Lber 23: U nongïalam ka BJP bad u MLA ka 19 South Shillong Konstituensi u Bah Sanbor Shullai ha ka sngi Saitjaiñ, ula ong, lada jop ka Kong Ampareen Lyngdoh bad ka Agatha Sangma ha ka ilekshon MP Lok Sabha ka long kaba thikna ba kin ïoh long ki Myntri ka Sorkar Pdeng.
Haba iakren bad ki lad pathai khubor u Bah Sanbor u la ong, “Ka jingai jingkyrshan ka BJP ïa ka NPP ha Meghalaya ka la pynthikna ba 100% ka Kong Ampareen bad ka Agatha ki kyrtong ka NPP ba kin jop ïa ka ilekshon MP bad kan long ka khana ba kine baroh ar ngut ki longkmie kin jop bad kine baroh arngut na ka bhah jong ki kynthei kin ïoh long ki Myntri ka Sorkar Pdeng baroh arngut.”
Ula bynrap ruh da kaba ong, “Ban phah da kiwei kan long kaba sepei, hynrei lada phah da ka Kong Ampareen bad Agatha ka lad ka don bha ïa ki, ban ïoh long Myntri bad kin lah ban wanrah ïa ki kam pynroi ha ka jylla bad ban thaw ïa ki lad ban aikam aijam ïa ki samla kiba khlem kam khlem jam.”
Halor ka jingkylli lada ka BJP ka lah ne em ban ai ïa ka jingpynthikna ba kitei ki kyrtong ka NPP lada ki jop ilekshon kin ïoh ïa ka shuki myntri, u Bah Sanbor ula ong, “Kidei beit ban ïoh namar kadei ha ka sien kaba nyngkong duh ban jop arngut ki kynthei bad kan long ruh ka khana pateng ba baroh ar ngut kin jop na ka NPP bad baroh ar ngut kin ïoh long Myntri ka Sorkar Pdeng bad kan long ka jingmyntoi kaba khraw ba kin ïatai bad ïakren halor ki mat kiba sahteng kiba dei na ka bynta ka bha ka miat jong ki paidbah ka jylla, ki samla khlem kam khlem jam bad ban wanrah ïa ki kam pynroi ki bapher bapher.”
U Bah Sanbor ula ong, ba um don jingsngew eiei halor ka jingshim rai ki Nongïalam ka BJP ban ai jingkyrshan noh ïa ka NPP ha ka ilekshon MP Lok Sabha ha Shillong bad Tura Constituency namar ka NPP bad ka BJP kidei kiba ïatreilang ha ka Sorkar MDA bad kumjuh ruh ha ka Sorkar NDA.
U la bynrap ruh da kaba ong, “Kum ki dkhot kiba burom ka BJP ngin bud bad kohnguh ïa ka jingbthah jong ki nongïalam ka party bad shen yn sa pynlong ïa ka jingïalang ha kylleng ki District bad ki nongkitkam ka BJP ban sdang ïa ka kam ïalap ilekshon bad ban ïatreilang ban ai jingkyrshan ïa ka Dr Ampareen bad ïa ka Agatha. Ka jingwan jingkyrshan ka BJP ka la pynthikna ba 100% ka Kong Ampareen bad ka Agatha kin jop ïa ka ilekshon MP.”