Shillong, Lber 23: U President ki samla National People’s Youth Front (NPYF) Bah Kitborlang Nongrem u la ong ba kam dei satia ka jingshisha ba ki samla NPP ki kynjah jar jar ha kane ka elekshon MP kumba la kynnoh da kiwei pat ki seng sainpyrthei.
“Ki samla NPP kim ju shongshit khlehbiej kumba long kiwei pat ki seng ban shu leit pyrta wat ha ki jaka bym dei. Ngi pyndep ïa ka kamram kum ki samla ban pynsngewthuh ïaki paidbah ïa ka nongrim treikam bad ka thong jong ka party,” ong u President ka NPYF.
Nalorkata, u ong ruh ba kum ki samla hi kim kwah ban leh shongshit hynrei ki kwah ba ka jingpynkhreh jong ki na bynta ka elekshon kadei ban long beit da ka burom ka akor da kaba klet noh ïa ki kam leh shongshit.
Haba kren pat halor ka kyrtong jong ka party, Kong Ampareen Lyngdoh, u Bah Nongrem u la ong ka jingmih ryntih ki longkmie ha ka sngi thep kyrteng ka la ai mynsiem haduh katta katta ïa ki nongïalam party bad kane hi ka la ai jingkyrmen ba ka kyrtong kan poi sha ka thong.
“Kan dei ruh ka burom lada ki paidbah ki ailad ïa ka longkmie kum jong i Kong Ampareen Lyngdoh ban ïoh mihkhmat ïa ka Shillong Parliamentary Seat ha Parliament,” ong u Bah Nongrem.
Kawei pat kaba utei u nongïalam ki samla NPP u kyntu ka log ba ki paidbah kim dei satia ban rai kyrkieh haba ki kyrshan ïa kino kino ki kyrtong hynrei ba ki dei ban da leh sani bha jai na ka bynta ka lawei ki khun ki ksiew bad ruh na ka bynta ka lawei jong ka jylla.
Lah ban kdew hangne, ka NPP mynta ka samoi ka sei da ki longkmie baroh arngut ban aireng na Shillong bad ruh na Tura seat katba kiwei pat ki party ki la sei da ki rangbah ban ïakhun pyrshah.
Dang ha ka sngi Thohdieng mynmiet, ka BJP ruh ka la shim ïa ka rai ba kan kyrshan lang ïa ki kyrtong ka NPP ha Shillong bad ruh ha Tura da ka jingkyrmen ba kine ki kyrtong kin poi sha ka thong.
