Shillong, Rymphang 23 : U Symbud Myntri Rangbah ba khmih ïa ka Tnad kam Pohïing u Bah Prestone Tynsong ha ka sngi Thohdieng ula ong ba ki briew kiba shong ba sah ha Maxwelton Estate kin hap pynkhreh ban mih na katei ka jaka lada ki dei kiba shu sah beain.
Haba ïakren bad ki nongthoh khubor, u Bah Prestone ula ong “Nga la thikna bha ba ka Aiñ kan ïeng rasong bad ka aiñ kan shim ïa la ka jong ka lynti bad lada ki dei shisha kita kiba sah beaiñ, haba kut hi kin hap pynkhreh ban mih noh na kane ka jaka”.
Ka Khasi Students’ Union (KSU) ka la ïai dawa ïa ka Sorkar Jylla ban kyndang mardor ïa ki nongshong beaiñ hapoh ka Maxwelton Estate kaba heh kumba 9 acre ka jaka bad kaba hap hapoh u pud u sam jong ka Dorbar Shnong ka Kenches Trance Oxford, Rilbong.
Haba kylli, u Bah Prestone ula ong “Em ka mukotduma ha ïing Bishar ka dang ïaid. Kata ka dei kaba nga ong, namar kata ngi hap ban ap bad na kata ka daw kaei kaba nga pyrshang ïathuh ïa phi ka long ba to ngin ap bad peit, ai ba ka aiñ kan ïaid hala ka jong ka lynti”.
