Shillong, Rymphang, 23: Ka Hynñiewtrep Achik National Movement ha ka sngi Thohdieng ka la dawa ïa uwei u briew uba kynthoh pyrshah ïa ka seng ha ka Facebook Page ba la ai kyrteng ‘Lympung ki Khun ka Ri’ ba u dei ban panmap hapoh 24 kynta hynrei lym kumta ka Seng kam banse ban mudui da ka ejahar sha ki bor jong ka aiñ.
Katkum kane ka jingkynthoh ha kane ka Facebook page, u nongkynthoh uba la paw kyrteng kum u HBK Lyngdoh u la kynthoh pyrshah ïa ka seng da kaba ong ba ka jingpynlong ka HANM ïa ka jingïakhih ha Jantar Mantar ha nongbah Delhi ha ka 3 tarik Naiweing 2023 ka dei kaba la bei pisa da ka National People’s Party (NPP).
Haba kyntait ïa ka jingshah kynnoh, u Vice President ka HANM Bah Bawan Nongsiej u la pynshai ba ka jingïakhih jong ka seng ka dei na ka bynta ki dawbah jong ka jaitbynriew na ka bynta ban pynurlong ïa ka jingdawa ban pynrung ïa ka Ktien Khasi ha ka Khyrnit Baphra jong ka Riti Synshar ka ri India kumba la mynjur da ka Iingdorbar Thawain ka Jylla ha ka 27 tarik Nailur 2018.
U nongkynthoh HBK Lyngdoh u kynthoh kumne: “Kawei na ki sengbhalang kaba leit pynthud ïa ka jingdawa pynrung ïa ka ktien Khasi ha ka 8th Schedule ka dei ka HANM. Kane ka Seng ka la leit sha Delhi ban dawa pynrung lang ïa ka ktien Khasi bad ka ktien Garo. Ka ktien Garo kam pat long qualified ban rung ha ka 8th Schedule te da dawa pynrung lang ha kajuh ka por ka ktah ïa ka ktien Khasi kaba lah long qualified ban rung ka hap ap haduh da ki phew snem shuh shuh ban ïa rung ryngkat bad ka Garo haduh ban da long qualified ka Garo.”
“Lehse ban leit pynthud kumtei dei ba sponsor da ka npp.”
