Mairang, Risaw 03: Ka Seng HYC North West Khasi Hills District, mynta ka sngi ka la ai da ka jingthoh sha u Syiem ka Hima Nongkhlaw, i Pa’iem Phrester Manik Syiem ban pynpaw ka jingsngewkhia halor ka jingïohlad ki bar jylla ban wan thang rnga ha ka Shnong Niangdai, Wahpipa bad Lawhuleng, kiba hap ha Eastern West Khasi Hills District.
Ha kane ka jingthoh ba la soi da u Bah Joplang Kharnaïor President bad u Bah Shembor Langrin, General Secretary, ka Seng ka ong ba kine kiba wan thang rnga ki la ïoh lad dei namar ba ki trai ne ki malik, ki Rangbah Shnong ki la ailad ïa ki ba kin thang rnga khlem da ïoh NOC ne ïoh jingbit na ka tnad Forest la ka long jong ka District Council ne jong ka sorkar jylla ruh.
“Kane ka jingwan thang rnga kine ki khyllah jait kiba bun kidei na ka jaidbynriew Nepali, ka la pynjot ïa ki khlaw ki btap bad pynjulor lut ïa ka mariang”, la ong ka jingujor jong ka Seng ha ka jingthoh sha u Syiem.
Ha kane ka jingthih na ka liang ka Seng ka la pynkynmaw ruh ïa u Syiem halor ka jingleh kine ki mynder, ha kaba uwei na kiba wan thang rnga u la ak ïalade kum u doktor jakoid ban pynkhem briew bad u la shim kabu ruh ban jrong kti bad leh kynshleiñ ïa kawei ka longkmie. Ka Seng ka ong ba kane ka jingleh ka pynpohdor ïa ka jaidbynriew Khasi bad ïa ki nongsynshar it nongsynshar Hima.
Kumta na ka liang ka Seng ka dawa na u Syiem ba udei ban pynshitom ïa baroh kiba ïadon bynta ha kane ka kam beaiñ kaba long pyrshah ruh ïa ka aiñ Forest Act 1972 and Environment Protection Act 1982.
