Shillong, Nailar 18 : Ka sorkar jylla ha ka sngi Palei ka la rai ban sdang biang ban pyllait ïa ki challan na ka bynta ban shalan noh ïa u mawshun shabar Meghalaya.
Kane kadei hadien ba ka sorkar ka la ïoh pdiang ïa ka jingshai na ka Coal and Mines Ministry kumjuh ruh na ka Ministry of Commerce haba ïadei bad ka hukum ba la pynmih da ka Meghalaya High Court ha ka 23tarik u Naitung mynta u snem.
Na ka liang u Symbud Myntri Rangbah ka jylla, Bah Prestone Tynsong haba kren bad ki lad pathai khubor, u la ong ba hadien ba ki ïoh pdiang ïa katei ka hukum, na ka liang ka sorkar jylla ka la rah ïa kane ka ishu bad ka sorkar pdeng kata bad ka tnad Coal & Mines kumjuh ruh bad ka Ministry of Commerce.
“Ka jingpynshai kaba ki ai ka long ba ïa u mawshun la u dei u major ne minor lah ban shalan sha Bangladesh ne sha kano kano ka Ri ha ka pyrthei baroh kawei,” ong u Symbud Myntri Rangbah da kaba pyntip ba dei naduh u bnai Jylliew ïa u mawshun ban shalan sha Bangladesh ba ïaid ha ka kyrteng minor, ki khlem ai challan shuh lait noh tang u major.
U la ïathuh ruh ba ka sorkar jylla lyngba u Advocate General, ki la ïoh pdiang ïa ka jingpyntip da ka ktien halor katei ka hukum. Kumta halor, na ka liang u Symbud Myntri Rangbah u la pynbna ïa ka rai jong ka sorkar ban sdang noh ban ai challan na ka bynta ban shalan ïa u mawshun shabar Meghalaya. Katkum ka jingïathuh jong u, ka sorkar ka la pynsangeh ban ai challan na ka bynta ban shalan ïa u mawshun naduh ka 23tarik u Jylliew 2020.
