Bun ka “Nga” ha ka jingkren u CM ha ka sngi laitluid, ym don eiei ïa ki mat ïada ïa ka jaidbynriew: HYC

Shillong, Nailar 18: Ka Seng HYC, Seng Kmie, ka la ther tyngeh halor ka jingkren u Myntri Rangbah u Conrad Sangma ha ka jingrakhe ïa ka sngi laitluid ka ri ha Shillong.
Ka kyrwoh ba la pyllait da u General Secretary ka Seng, u Bah Roy Kupar Synrem, la ong ba ha kane ka jingkren u Myntri Rangbah, la bun ka kyntien “Nga”, lane ka “Sorkar jong nga”, ym don satia ka kyntien, “Ngi” ne ka “Sorkar jong ngi” bad kumjuh ruh ki kyntien ,”Nga la sdang”, “Nga la leh”.
U Bah Roy, u la ong ba ha kane ka jingkren kaba 24 sla bad 46 paragraph, u Conrad um shym la kren wat tang khyndiat ruh halor ki mat jingïada ïa ka ri bad jaidbynriew, kum ka ILP, ka MRSS ( Amendment ) Bill, 2020 , ka jingdawa ban weng ïa ka CAA na Meghalaya, ka jingpynrung ïa ka ktien Khasi ha ka Khyrnit ba phra.
“Kane kadei ka jingibeiñ ïa ki nongshongshnong ka jylla bad khamtam eh ïa ki trai ri trai muluk”, la ong u Bah Roy.
Shuh shuh ka HYC, ka ong ba ha kane ka jingkren u Myntri Rangbah, um shynm la kren wat tang shi kyntien ruh halor ka jingbamsap kaba don ha ka sorkar jong u lane halor ka jinglait ei ka khajna bad ym shym la don wat tang shi kyntien ruh halor ka jingkiew dor ki mar ki mata lane ka jingkiew syndet ka jingmang ha ki jingtrei ïa ki kam pynroi ne ki projek ba la pyntrei ha kine ki saw snem tam.
Ka kyrwoh ka ong ruh ba u Myntri Rangbah, um shym la kren eiei kaei kaba ka sorkar jong u ka la leh halor ka jingïaleh pyrshah jaidbynriewlum bad ka jingtreikam pyrshah Khristan ka RSS bad BJP, kum ka jingkhang doh masi, ka jingshah thombor ki Khristan ha kylleng ka ri, ka jingphah kren ne hikai Hindi haduh Class X.
Ym shym la don wat tang shi kyntien ruh halor ka jingjyllei u drok kaba la ktah ïa kiba bun ki samla, ka jingktah ïa ki longïing longsem, hynrei u Myntri Rangbah pat um shym la sngew ba kadei kaba mat kaba donkam ban kren. “Lehse ha u Myntri Rangbah, kine ki mat ki long ki bym donkam na ka bynta u paidbah”, la ong ka HYC.
U Myntri Rangbah, la ong ka HYC ba um shym la kren eiei ruh em halor ka jingdawa kiba bun ban pynduh ne weng noh ïa ka aiñ ïakhalai ha ka jylla, um shym la kren ruh halor ka jingïada ïa ka mei mariang, nangta halor ka jingtih Uranium wat lada ka la don ka jingdawa ban wanrah da ka Resolution ha ka ïingdorbar Thawaiñ.
Ka Seng HYC ka ong ruh ba u Myntri Rangbah ha ka jingkren jong u, um shym la pynpaw eiei halor ka jingpynkhlaiñ ïa ki Dorbar Shnong, ki Dorbar Raid, ki Dorbar Hima, ki Nokma bad wat ïa ki District Council ruh. “Kane ka pyni ba ka sorkar kam kheiñ kor satia ïa ki bor synshar trai ri jong ka jylla.