Shillong, Nailar 18: Ka Sankardev College Shillong ha ka sngi Palei ka la pynkup burom ïa ki pulit pynïaid kali jong ka Shillong Traffic Police, ki nongtrei jong ka Shillong Municipal Board, bad ki Trained Nurse Association of India ban ai jingithuh ïa u synïang uba ki la noh sha ka imlang sahlang khamtam ha ka por ba dang jur ka jingpur sted u khñiang jingpang Corona Virus bad ruh kum shi bynta ïa ka jingrakhe ïa ka lyngkhuh snem ba 60 naduh ba la seng ïa ka.
Haba ai jingkren, ka Deputy Commissioner(DC) East Khasi Hills District, ka Kong Isawanda Laloo kaba long ruh ka Kongsan, ka la ban jur ïa ka jingdonkam ban pynbeit ïa ka rukom pynïaid ïa ki kali, ka la pyrto ruh ïa ka rukom trei jong ki pulit ban wanrah ïa ka jingsting ha ka jingkhapngiah palat ka ïaid ka ïeng bad kaba ktah salonsar ïa u nongleit nongwan.
Ka DC la kyntu ïa u paidbah nongshong shnong ba kin ïatrei lang ban wanrah ïa ka jingkylluid ha ka leit ka wan, da kaba ïa burom markylliang haba ïaid ha lynti.
“Bunsien ki kali bad ki ar shaka ki ju pynïeng ha rud surok, ha khep ha khep haba ñiah ïa ki kali ha surok ruh ki ïaleh ban tur shakhmat, kane ka pynjubor arshah ïa ka jingkhim bad ka wanrah ïa ka jingdheng kali,” ong ka Deputy Commissioner.
Ha ka juh ka por ka la ïaroh ïa ki dkhot ka Municipal board kiba la long ka stieh khamtam ha ka por ba dang sdang ka khlam covid ha kaba, kiba bun kim nud wat ban ktah ïa ki tiar jaboh kiba mih na ki hospital hynrei ka Municipal Board kam shem la kyntait ban leh ïa kane ka kamram.
Shuh shuh ka la ïaroh bad ai burom ïa ka college namar ka jingkynjoh jong ka sha ka 60 snem, “Nga sngewtynnad ban tip ba ha ka 02 tarik u Nailur 2022, ka kolej kan sa kynjoh jingdap 60 snem. Nga sngewtynnad namar ba kum ka jingrakhe ïa ka jingdap 60 snem ka kolej ka ithuh ruh ïa kiwei pat ki nongtrei kiba trei na ka bynta ka imlang sahlang, kane ka pynpaw ïa ka jingïatylli lang bad ka jingïaburom markylliang”, bynrap ka Deputy Commissioner.
Ha kane ka sngi la wan ban ïadon bynta lang ka , Bah Sylvester Nongtnger Superintendent of Police Traffic police, Bah FB Chyne, Executive Engineer ka Shillong Municipal Board nalor kiwei kiwei.
