Jowai, Ïaïong 10: Ka ophis jong ka District Medical and Health Officer, ha ryngkat ka jingtreilang bad ka tnad AYUSH mynta ka sngi 10 tarik u Ïaïong kila rakhe ïa ka ‘World Homoeopathy Day’ ha nongbah Jowai ha ka jingïalang bala pynlong ha District Library Auditorium, Mynthong, Jowai, halor ka phang kaba ong “Joy of Homoeopathy Day.”
Na ka liang u Deputy Commissioner ka West Jaiñtia Hills District u Abhinav Kumar Singh, IAS, ula long u kongsan, katba ka Dr. Patricia Shylla, DM&HO, kum ka symbud kongsan.
Ka thong jong kane ka jingrakhe ïa ka ‘World Homoeopathy Day’ ka long shi bynta ban ai jingtip khambniah shaphang ka rukom ai dawai homeopathy ïa kaba la hikai naduh ki por mynshwa, bad kum ka dak ban kynmaw burom ïa ka sngi kha jong u Dr. Samuel Hahnemann, uba dei u nonglap ïa ka homeopathy kawei na ka lad ban ai jingsumar lyngba ki dawai dashin kiba ïoh na ka mariang.
U Abhinav Kumar Singh, haba ai jingkren ula ai ka jingïaroh ïa kane ka tnad jong ka koit ka khiah da kaba ong ka rukom ai dawai homeopathy kala treikam la 200 snem bad kaba bteng ban ai jingshakri haduh mynta, ula kdew halor ka jingdawa jong ki dawai homeopathy, kumta u kyntu ïa ki samla ban kin don ïa ka thong ban pynleit jingmut sha kane ka kam dawai homeopathy kaba dei ka wei na ki jingsumar ba kongsan.
Ka Dr. Patricia Shylla, the District Medical and Health Officer, kala ong ka homeopathy ka long kaba donkam eh haka ka liang ka koit ka khiah, namar ki dawai homeopathy ki don ka jingïadei kaba ïajan eh bad ka mariang bad ki bym don jingktah eiei haba dih ïa ki.
Kala ong hapdeng kine ki snem kila don shibun kiba la ïoh jingkoit da ki dawai homeopathy, kumta ka Dr. Shylla ka kitbok ïa baroh kito kiba don bynta ha kane ka kam.
Ka Dr. (Mrs.) Bonnie T. Hinge, DNO jong ka tnad AYUSH kala ai jingbatai halor kane ka phang da kaba pynsngew shi bynta na kane ka jingrakhe kila dep ban pynlong ïaki prokram shi taïew lynter, kaba kynthup ïa ki health camp ha ki school bala lam khmat da Dr. Rymbai bad ka kynhun, kynjuh ka jingai dawai ei free medical camp bala lam khmat da u Dr. S. Pyrbot bad ka kynhun, kala pynsngew ruh halor ka jingkiew ka rukom ai dawai AYUSH kaba kynthup lang Ayurveda, Yoga, Unani, Siddha, bad Homeopathy.
Na ka liang ka Dr. R. Synrem kala ïathuh shaphang ka kyntien Homeopathy, da kaba ong ba ki don haduh 3,00,000 ngut ki nongai dawai Homeopathy kiba la dep ban registered bad lyngba jong kine kila trei borbah ban wanrah ïa ka jingkoit jingkhiah hapoh ka ri. La ïatuh ba kumba 55 percent ki briew ha kylleng ka pyrthei kila pyndonkam ïa ki dawai Homeopathy. Kiwei de kiba ai jingkren ki kynthup ïa ka Dr. Daphnecia Pariat.
