Shillong, Ïaïong 10: Ki dkhot jong ki sengbhalang kiba don hapoh ka thaiñ Mawsynram C&RD Block, East Khasi Hills District ha ka sngi Palei ki la khang tala ïa ka ophis treikam jong ka Feedback Energy Distribution Company Limited (FEDCO) kaba don ha ka shnong Mawsynram halor ka jingkynnoh ba ka jingtreikam ka long kaba thurmur shaba palat.
Ki dkhot sengbhalang ki kynthup ïa ka Hynñiewtrep National Youth Council (HNYF), Hynñiewtrep Youths Council (HYC) bad ka Federation of Khasi Jaiñtia & Garo People’s (FKJGP).
U chairman jong ka kynhun ki sengbhalang ha Mawsynram Block Bah Tyngshain Ronsang bad u Bah Kyllang Thongni haba kren ha ki lad pathai khubor ki la ong ba ka jingkhang tala ïa ka ophis treikam jong ka FEDCO ka long hadien ba ki la ïoh jingujor bad ki jingud jingnam na ki paidbah kylleng jong ki shnong kiba don hapoh ka thaiñ Mawsynram kiba ju pyndonkam ïa ka bording halor ka jingbym siudñiew jong ka kompani ïa ki paidbah ba pyndonkam bording da kaba pynkiew ïa ka bai thang bording bad la kynnoh ruh ba ka kompani ka ju pynduh khah khah ruh ïa ka bording ha ka thaiñ.
Ki la ong ruh ba ha ki por ba ladep ka rukom treikam jong ka Meghalaya Power Distribution Corporation Limited (MePDCL) ka long kaba biang bha hynrei tang shu shimti da ka FEDCO ha ka thaiñ Weiloi, Mawsynram, Dangar, Ranikor, la kumba san snem tam ka la pynsyrtok bad ka la shimkabu ruh ïa ki paidbah da kaba pynkiew ïa ka bai bording lai shah saw shah wat ïa ki longiing kiba hap hapoh u laiñ ka jingduk ne BPL.
Kine ki lai tylli ki kynhun seng ki pyntip ruh ba kin sa leit khang tala ïa ki ophis treikam jong ka FEDCO kiba don ha ka shnong Weiloi, Dangar bad Ranikor.
Ha kajuh ka por ki la pyntip ba kin sa leit ban pynsngew ha u Myntri ka tnat Bording ka Sorkar Jylla u Abu Taher Mondal bad kumjuh ruh sha ki bor Sorkar ban kin leh eiei halor kine ki jingeh ba ki paidbah ki ïa kynduh.
Ki la ong ruh ba paidbah kim pdiang satia ïa ka FEDCO bad dawa ruh ba ka Sorkar ka dei ban pyndam noh ïa ki soskular ba la ïateh hapdeng ka FEDCO bad ka Sorkar.
