Khliehriat, Nohprah 04: Ha ryngkat lang bad ka pyrthei baroh kawei, ka East Jaiñtia Hills District ruh ka la rakhe ïa ka sngi kyrpang, ka World AIDS Day bad ïa kane ka prokram la pynlong da ka Mihmyntdu Community Social Welfare Association (MCSWA), ryngkat ka jingïatreilang bad ka Meghalaya AIDS Control Society (MACS), Shillong kumjuh ruh bad ka District Legal Services Authority (DLSA), East Jaiñtia Hills District.
Ka kyntien phira jong kane ka sngi World AIDS Day ka dei ‘Shim ïa ka lynti kaba dei’ (Take the right path)
Haba kren ha ka jingïalang, u Sub-Divisional Officer (Sadar), East Jaiñtia Hills District, u Aditya Verma, IAS, u la ong ba kane ka World AIDS Day ka dei ka sngi kaba kyrpang bad kaba donkam bha ha kaba ïadei bad ka jingpynshai paidbah shapang ka jingpang HIV/ AIDS bad u la khot ïa kiwei kiwei ki tnat sorkar ruh ban shim ïa ka jingïatreilang ban ïakhun pyrshah ïa kane ka jingpang HIV/AIDS.
U Aditya Verma, u la ban jur halor kitei ki kyntien phira ‘Shim ïa ka lynti kaba dei’ ha kaba u la bynrap bad ong ba ban pynurlong ïa ka jingthmu ban rat dyngkhong ïa kane ka jait jingpang dei ban ai jingpynshai ne pynsngewthuh bad ruh ban pynkup bor ïa ki khun samla ban ailad ruh ïa ki samla ba kin pynlong ïa ka prokram ai jingpynshai, ban pynlong ruh ïa ki kita kiwei kiwei pat ki samla kiba koit ba khiah bha, ki samla ki dei ruh ban ïa shim bynta ha kino kino ki kam ha ka imlang ka sahlang, ban pynsngewthuh ruh ïa ki paidbah ba kim dei ban peit beiñ ne peit poh ïa kito kiba don ïa ka jingpang HIV/ AIDS.
U la kren ruh halor ka jingthmu, 95-95-95 Strategy kaba dei ka jingthmu jong ka Joint United Nations Programme halor ka jingbuh thong ban lah ban tehlakam ïa ka jingpang HIV/AIDS (UNAIDS), kata ban ratdyngkhong ïa ka jingpang HIV kata haduh u snem 2030, halor kane u la ai mynsiem bad pynshlur ïa ka tnat ka koit ka khiah jong ka district ba ka tnat ka dei ban dang ïai bteng khlem shongthait ban ai ïa ka jingshakri ïa ki paidbah bad da ka jingïatreilang ruh yn lah ban tehlakam ne ban pynduh jait ïa kane ka jingpang.
U District Medical &Health Officer, East Jaiñtia Hills District, u Dr D. Shylla u la ong ba kane ka sngi kaba dei kata ka World AIDS Day kaba ju pynlong man la u snem, ka long ba ki briew kiba don ïa une u khñiang jingpang ki lah ban im man la ka sngi khlem da pynsaphriang shuh ïa une u khñiang jingpang sha kiwei pat bad u la pynshai ruh ba kumno une u khñiang jingpang u ïabit sha kiwei pat, shuh shuh, u la kren ruh ka jingdonkam ban don ïa jingïatreilang bad ki shnong ki thaw ban tehlakam ïa ka jingsaphriang une u khñiang jingpang ba ki bor pyniaid shnong ki dei ban kyntu bad pynshlur ïa ki paidbah ba ki dei ban leit phah test ha ki jaka ai jingsumar khnang ban dup tip ïa ka jinglong jingman ka koit ka khiah, u la ong ruh ba ki don bun ki jaka ban test ha ki jaka ai jingsumar hapoh ka district, u kyntu ïa ki paidbah ba ki dei ban pynsaphriang ïa ka khubor ha kaba ïadei bad ka jingshyrkhei ka jingpang HIV/AIDS ba ki nongshong shnong ki dei ban da leit ban test.
Kiba la ai jingkren ki kynthup u Medical & Health Officer In-charge Opioid Substitution Therapy, East Jaiñtia Hills District, u Dr J. Nongtdu, u Medical & Health Officer In-charge Integrated Counselling and Testing Centre, East Jaiñtia Hills District, u Dr D. Nongpluh, u Assistant Director (Social Protection & Mainstreaming) MACS, Shillong, u bah Ajoy Lanong bad u Panel Lawyer DLSA, East Jaiñtia Hills District, u bah P.N Swer.
Ha kane ka prokram la ioh ruh ïa kawei ka drama lyngkot na kawei ka kynhun Self Help Group (SHG) kaba na Ladrymbai, ka jingïakren muk-mak lane ka Extempore Speech ba la ïa shim bynta da ka kynhun jong ki ASHA.
Kiwei pat kiba la ïa don lang ha kane ka prokram ki kynthup ruh u Medical & Health Officer In-charge Integrated Counselling and Testing Centre, East Jaiñtia Hills District, u Dr D. Nongpluh, u Panel Lawyer DLSA, East Jaiñtia Hills District, u bah P.N Swer, u Assistant Director (Social Protection & Mainstreaming) MACS, Shillong, u bah Ajoy Lanong, ka Programme Manager, Mihmyntdu Community Social Welfare Association (MCSWA), TI CC Khliehriat, ka kong Rinibeth Patlong,u Chief Functionary MCSWA, u bah Aris J Nongkynrih, ki ASHA lem bad ki kynhun jong ki Self Help Group (SHGs).
