Jowai, K’Lyngkot 28: Ha Jowai la rakhe ïa ka Republic Day ba 74 hynnin ka sngi da ki bor pynïaid ka West Jaiñtia Hills District ha madan Jrisaleiñ Jowai, ha kaba u Deputy Commissioner ka West Jaiñtia Hills u bah Batlang S Sohliya, IAS ula pynher ïaka lama lai rong ka ri bad shim ruh ïa ka Rashtriya Salute ryngkat ka jingrwai ïa ka National Anthem bala ïalam da ka skul JNV Mukhla bad ka QC Springside SS, Jowai.
U bah Sohliya ula ai khublei Republic ïa baroh kiba la poi sha kane ka jingrakhe bad kumjuh ïa baroh ki nongshong shnong jong ka District hi baroh kawei.
Kila don 21 tylli ki kynhun kiba la ïashim bynta ha ka parade kiba kynthup ïa ka District Police Jowai, ka NCC Contingents jong ka Government Girls Higher Secondary Schools, Jowai, ka Meghalaya Bharat Scouts & Guides, Jowai bad 18 tylli ki skul.
Ka skul JNV, Mukhla ka la ïoh rah ïa ka nam ba nyngkong, ka nam ba-ar la ïoh rah da ka Govt. Boys HS School, Jowai bad ka nam ba-lai la rah da ka St. Mary Mazzarello HS School, Jowai.
Ka la don ruh ka jingpyni ïa ki Tableau bala iashim bynta da ki 13 tylli ki tnad sorkar, kiba pyni ïa ki jingtreikam bapher bapher jong ki lyngba ki skhim bad ki projek. Napdeng kine ka ophis District Sericulture Jowai kala ïoh ïa ka nam ba nyngkong, ka ophis District Horticulture Officer, Jowai kala ïoh ïa ka nam ba-ar bad ka ophis District Commerce & Industries Centre, Jowai kala ïoh ïa ka nam ba-lai.
Ha kane ka sngi kila don ruh ki jingpynbyrngia kum ki shad, ki rwai bala ïashim bynta da ki dong bad shnong bapher bapher hapoh ka nongbah Jowai. Kala don ruh ka jingleit sam ïa ki jingbam bad ki jingai sngewbha sha ki jaka ri Khunswet da ki tnat sorkar bapher bapher bad ruh da ki kynhun seng.
Ha ka por janmiet ka don ruh ka jingïalehkai Football Final kaba ïakhun hapdeng ka Demthring SC pyrshah ïa ka Sabah Muswang SC ha Kiang Nangbah Stadium, Ladthalaboh.
Ha Amlarem la pynlong ha madan ïalehkai jong ka Amlarem Government Lower Primary School. I kong J.U. Kharpur, Additional Deputy Commissioner, Incharge Amlarem Civil Sub-Division ila pynher ïa ka Lama lai rong bad shim ruh ïa ka Rashtriya Salute ryngkat ka jingrwai ieit ri (National Anthem) bala lam khmat da ka Mang Hai Ryum SS, Amlarem.
Ki don 3 tylli ki kynhun kiba la shim bynta ha ka parade kiba kynthup ïa ka Police Department bad ar tylli ki skul. Ka Riwar Jaiñtia Church of God SS, Ladjaplem kala ïoh ïa ka nam ba nyngkong katba ka Syiem Jingsuk HSS, Amlarem kala ïoh ïa ka nam ba-ar.
Ka don ruh ka jingpyni ïa ki Tableau da ki 4 tylli ki tnat sorkar. Ka ophis Sub-Divisional Veterinary Officer , Amlarem kala ïoh ïa ka nam ba nyngkong, ka ophis Sub-Divisional Agricultural kala ïoh ïa ka nam ba-ar katba ka Sub-Divisional Officer PHE, Amlarem kala ïoh ïa ka nam ba-lai. Ki la don ruh ki jingrwai bad jingshad bala ïashim bynta da ki khynnah skul.
Ha Laskeiñ C&RD Bloc ruh la rakhe lang ïa kane ka Republic Day ba 74 ha madan ïalehkai Hula, Moosyiem, Shangpung. U Block Development Officer jong ka Laskeiñ u ma B. Niang ula long u kongsan bad pynher ïa ka Lama Lai rong ka ri.
