La pynkhreh ka tnat ban ïakhun ïa ki jingshah pynjulor jong ki bor mariang, ong u Bah Shylla

Shillong, Jymmang 14: U Myntri ka tnat Revenue and Disaster Management u Bah Kyrmen Shylla ha ka sngi Balang u la ong ba ka tnat ka la pynkhreh pura ban ïakhun ïa ki jingeh kiba mih na ki jingjia ki kam shah pynjulor ha ki kam jong ki bor ka mariang ne ka jing hab slap kaba jur.
Ha kaba ïadei bad kane haba kren sha ki lad pathai khubor u Bah Shylla u la ong ba ka tnat ka la shim bun ki lad ki lynti ban pynkhreh lada jia ba wan kino kino ki jingjia shah lynshop ha ki bor ka mariang.
“Ngi kyrpad ruh ïa ki paidbah ban shim ïa ka kabu ïa ki lad jingpyntip kiba ka sorkar ka la buh. Watla ngim lah ban shaniah 100 percent ha ki, hynrei ngi dei pat ban long kiba la pynkhreh manla ka por,” u la ong.
Ha kaba ïadei pat bad ka surok ha Khliehriat u Bah Shylla u la ong, “Mynta ki kam maramot ïa ka surok ha Khliehriat ka la dang ïaid bad shen ïa kane ka kam yn lah ban pyndep noh kloi bad ka jingeh hi ka dei ba ki kali kit palat pud ki wanrah ka jingeh ban sumar ïa ka surok NH-6.