La pynjlan ka Tnat Khlaw ban aiwai ïa ka jaka theh ñuit ha Marten, ïathuh u Bah Sniawbhalang

By Mawphor Editor On Mar 17, 2025

Shillong, Lber 16: Ka tnat ki kam khlaw ka la pynjlan ïa ka jingai wai ïa ka jaka kaba 18 acre ha Marten sha ka Shillong Municipal Board (SMB) haduh ka snem 2026.
Ka jaka ha Marten ka dei tang kane ka jaka ha Nongbah kaba dei ka jaka theh ñuit bad kaba la buh da ka SMB naduh ka snem 1938. Ka jingeh ka jaka ka long 18 acre bad ïa kane ka jaka la aiwai na ka tnat forest.
Kane ka don jngai ka jaka kaba long 7 km na nongbah Shillong bad ka dei ruh kaba don ha ka bynta jong ka Riatkhwan Reserved Forest.
Ïa kane ka jaka la ai wai sha ka SMB da ka tnat Forest lyngba ka order kaba 19 tarik u Jymmang, 1938 kaba la nang pynbeit bad kaba la pynjlan haduh ka snem 2026 vide notification.
Ha kane ka jaka, ka jingwan theh ñuit kaba manla ka sngi ka la kot sha ka 171 metric ton na ki jaka sor bad khap sor ka Shillong bad kiwei pat ki shnong kiba marjan.
Ki lad ki lynti na ka bynta ban pynïaid shakhmat ïa ki kam ka la nang ïaid ha Marten ka long 170 TPD compost plant kaba la pyndonkam.
Ïa kane la pyntip da u Symbud Myntri Rangbah ka jylla u ba khmih ïa ka tnat Pynroi Sor u Bah Sniawbhalang Dhar dang shen hapoh ka ïing dorbar thaw aiñ.
Na ka bynta ka Bio Medical Waste (BMW), ka Common Bio Medical Waste Treatment & Disposal Facility (CBMWTDF) la dep ban buh bad ki kam ki la nang ïaid shakhmat ha Marten ha ka jaka kaba heh 2009.06 sq m ha kaba ka la don ka jinglum ïa ki Bio Medical waste na ki jaka sumar bapher bapher bad ki la kit ruh sha ki jaka kiba dei.
Ka CBMWTDF ka kynthup ïa ka jingkit ïa ki ñuit kaba long 100 kg ha ka shi kynta na ka bynta ban bret ïa ki yellow category BMW, nang 50 kg shi kynta na ka bynta ka autoclave kaba dei ïa ki disinfecting red & blue category ki ñuit bad 50 kg shi kynta ki shredder.
Ka jingpynwan dur ïa kitei ki jaka theh ñuit ka long 3 snem na ka bynta ka phase 1 bad 7 snem na ka bynta ka 2.
Ka jinglum ïa ki ñuit na ka nongbah la mang ba ka dei ban long 196 TPD bad ka percentage ka jingkyntait kaba dei ban leit sha kane ka jaka theh ñuit ka long 23%.