New Delhi, Nailur 9 : Kan long ka histori ban sah jingkynmaw ïa ki kam pynmih bording jongka pyrthei mynta ka sngi lyngba ka jingpynbna ïa ka Global Biofuels Alliance (GBA) da u Myntri Rangbah Duh, u Narendra Modi ha ka jaka ba pynlong ïa ka G20 Summit.
Ka GBA ka dei ka sienjam ba ïalam lynti da ka India ban wanrah ïa ka jingïasoh lang jong ki Sorkar, ki kynhun jong ki ri bad kito kiba trei ha kine ki kam ban plie lad ïa ka jingpdiang ïa ki biofuel. Da kaba wanrah lang ïa ki nongpyndonkam bad ki nongpynmih ba heh tam ïa ki
biofuel ban kyntiew ïa ka jingshna bad jingpyndonkam ïa ki biofuel, kane ka sienjam ka thmu ban pynbun ïa ki biofuel kum ka bynta ba kongsan ha ka jingkylla ha ki kam pynmih bording bad ruh ha ka jingdon bynta ha ki lad kamai jakpoh bad ka jingkiew shaphrang ka ïoh ka kot.
Ka jingpynbna ïa ka GBA ka pyni ïa ka rukom long kaba ñiewkor ïa ka jingpyndep ïa ka kam jong ka agenda jong ka India kum ka G20 President bad ka jingmihkhmat kum ka “Sur jong ka thaiñ shathie jong ka pyrthei’’.
Ka GBA kan kyrshan ïa ki kam shna bad pyndonkam ïa ki biofuel kiba ïaineh ha kylleng ka pyrthei da kaba pynbiang ïa ki kam kyntiew jinglah treikam bapher bapher, ka jingkyrshan ha ka teknoloji na ka bynta ki kam ha ki ri bad ka jingkyntiew ïa ka jingïasam ïa ki jingshem na ki polisi. Kan plie lad ïa ka jingpyndonkam ïa ka ïew digital ban ai jingïarap ia ki karkhana, ki ri, kito kiba don bynta ha kine ki kam ban sngewthuh ïa ka jingdawa bad ka jinglah pynbiang, ha ryngkat ka jingpynïasoh ïa ki nongai teknoloji bad ki nongpyndonkam ïa kine ki teknoloji. Kan plie lad ruh ïa ka jingshna, jingpdiang bad jingpyntreikam jong ki kyndon ba la ithuh da ki ri, ki nongrim na ka bynta ka jingïaineh bad ki jingteh lakam ban ai jingmyntoi ïa ka jingpdiang bad ka khaïi pateng ïa ki biofuels.
Kane ka sienjam kan ïarap ïa ka India ha ki rukom bapher bapher. Ka GBA kum ka jingmih na kane ka G20 presidency, kan ïarap ban pynkhlaiñ ïa ka kyrdan jong ka India ha ka pyrthei.
Shuh shuh, kane ka alliance kan peit bniah ïa ka jingïatrei lang bad kan plie shuh shuh ki lad ïa ki karkhana ka India ha kaba ïadei bad ka jingshalan ïa ki teknoloji bad ki kor. Kan ïarap ban pynstet ïa ki prokram biofuel jong ka India ba la don lypa kum ka PM-JIVAN Yojna, SATAT, bad ka skhim GOBARdhan bad kane kan kyntiew ïa ka ïoh ka kot jong ki nongrep,
kan plie ïa ki lad ïoh kam bad kan kyntiew ïa ka India. ka ïew ethanol jong ka pyrthei ka dei kaba la antad ha ka USD 99.06 billion ha u 2022 bad la antad ba kane kan kiew ha ka CAGR kaba 5.1% shuwa u 2032 bad kan tam ïa ka USD 162.12 billion shuwa u 2032. Katkum ka IEA, kan don ka lad kiew 3.5-5 shah ha ki kam biofuel shuwa u 2050 namar ki thong Net Zero, bad kane ka plie ki lad ïa ka India.
Ki ri bad ki kynhun kiba la rung mynta ha ka GBA ki long 19 tylli ki ri bad 12 tylli ki kynhun na ki ri bapher bapher ki la mynjur ban rung ha ka GBA. Ki ri G20 (07) ba kyrshan ïa ka GBA: Argentina, Brazil, Canada, 4. India 5. Italy, 6.
South Africa, USA Ki ri ba khot sngewbha ha ka G20 (04) kiba kyrshan ïa ka GBA: Bangladesh, Singapore, Mauritius, UAE Ki ri ki bym hap hapoh ka G20 (08) kiba kyrshan ïa ka GBA: Iceland, Kenya, Guyana, 4. Paraguay, 5. Seychelles, Sri Lanka, Uganda bad Finland
Ki kynhun na ki ri bapher bapher : World Bank, Asian Development Bank, World Economic Forum, World LPG Organization, UN Energy for All, UNIDO, Biofutures Platform, International Civil Aviation Organization, International Energy Agency, International Energy Forum, International Renewable Energy Agency, World Biogas Association.
Ki dkhot ka GBA ki kynthup ïa nongpyndonkam bad ki nongpynmih biofeuel ba heh tam. Ka USA (52%), Brazil (30%) bad India (3%), ki don ka bynta kaba 85% ha ka jingpynmih bad kumba 81% ha ka jingpyndonkam ïa ka ethanol.
