Shillong, Nailar 25: U Bah John F Kharshiiing ha ryngkat ka jingdon bynta lang u Dr Bodhi S Rani u ha ka sngi Palei ki la ïoh ban pynlait paidbah ïa ka kot kaba ki la ïathoh bad lum thup ïa ki jingjia shaphang ki Hima Khasi ïa kaba la jer kyrteng ïa kane ka kot ka The Khasi States A Brief Historical Timeline 1771 to 2017 ha Shillong College, Shillong ha kaba la pynlait paidbah da ka Dr E Kharkongngor Principal jong ka kolej.
Haba kren ha kane ka sngi u Bah John u la ong ba kane ka jinglum thup ïa ki jingjia ka long ba ki longdien kin ïoh ïa ki jingtip ba paka ïa kaei kaba kum ki hima Khasi ki la ïaid lyngba ha kine ki 246 snem ba la leit. U la ïathuh ruh ba ki tarik bad ki jingjia kiba la kdew ha kane ka kot ki long kiba don ki kot ki sla kiba sakhi ba kaei kaba ki thoh ka dei ka jingshisha.
U Bah John u la ong ba kane ka jingpynmih ïa kane ka kot ka long ruh shinbynta ban ïarap ym tang ïa ki Khasi kiba kwah ban ïoh jingtip shaphang ka mynnor jong ki hima Khasi hynrei ban pynsngewthuh ruh khamtam ïa ki ophisar sorkar pdeng kiba trei ha ka jylla kim peiphang satia shaphang kiba bun ki mat kaba ki hap ban ïa kynduh man ka sngi da kaba ai nuksa kum ïa ki syiem ki hima, ki raid bad ki ri raid bad kiwei kiwei kiba ha kiwei pat ki dustur. U la ïathuh ruh ba wat ki ophisar jong ka Home Ministry ki pan jingtip na u halor ki Khasi State bad “da kane ka kot kan long ka jubab ïa ki jingkylli bad kin ai ka jingtip kaba thikna” u la ong.
U Bah John u la ïathuh ruh ba na ka liang jong ki arngut ki la dep ban pynlait ïa kawei ka kot kaba ym duna ïa ka 500 sla kaba ki lah ban ban ïoh pule khlem donkam siew lyngba ki moblie phone na ki internet ïa kaba tip kyrteng kum ka The Federation Of Khasi States, Epistemology and Politics”
Shuh shuh u la ong ruh ba da kane ka kot lehse kan rah jingshai ïa ki pud ki sam jong ki hima Khasi bad kaba lah ban ïarap ha kaban pynbeit ïa u pud u sam ka jylla namar ha ka First Scheduled jong ka Riti Synshar ka ri kaba kdew shaphang ka jylla Assam ka don ka bynta ba ki thoh shaphang ka Khasi State.
