Shillong, Nailar 25 : U Myntri Rangbah ka jylla, Conrad K Sangma ha ka sngi Palei u la ong ba kam don satia kano kano ka jingdonkti lang ha ka jingpynïaid ïew beaiñ ïa u dewiong da ka sorkar jylla.
Haba kren bad ki lad pathai khubor, u Conrad u la kynthoh kylla ïa u Nongïalam ka Liang Pyrshah Dr. Mukul Sangma halor katei ka jingwad daw jong u ïa ka NPP kaba ïalam mynta ïa ka sorkar synrop jongka Meghalaya Democratic Alliance. Nalorkata u la pynkynmaw ruh ïa ka jingbymlah jong ka sorkar jong u ban teh lakam ïa ka tih dewiong beain ha ki phra snem ba u bat kum u Myntri Rangbah ka jylla.
“Kam don satia kata ka jingkylli ban ïarap ne donkti lang. Ha ka jingsihsha kadei ha ka por jong ka Liang Pyrshah ba kam shym la don satia ka jingtehlakam ïa kitei ki jait kam,” bynrap shuh shuh u Myntri Rangbah.
Shuh shuh shuh u la ong ruh ba dei haduh ka jingshimti jong ka sorkar MDA ba ïalam da ka NPP ba ki la sdang ban pyntreikam noh ïa ka MMDR Act kaba la teh pyrkhing ïa ki kyndon na ka bynta kito kiba donkti ha katei ka kam beaiñ.
Haba kren pat halor ka jingkhlad dang shen jong uwei u briew bad uwei pat uba la mynsaw na ka jingshah ban ha kawei ka krem dewiong ha West Khasi Hills, u Myntri Rangbah u la pyntip ba la dep ban kem ïa u trai jong katei ka par.
Shuh shuh u pynpaw ruh ba don ki jingeh kiba long ka dawbah ban poi sha kitei ki par kiba don hapoh ka distrik.
