Sawsymper, ‘Naiwieng, 13: Ka lympung ïalehkai kynjatbol ba la tip kum ka VI Open Knockout Football Tournament (OKFT) 2022 ba la pynïaid da ka Federation of Khasi Jaiñtia & Garo People (FKJGP), Sawsymper Circle, East Khasi Hills District la ïoh ba plie pyrda ha ka sngi saitjaiñ jong ka taïew da u bah Rangstarwell Wankhar, Ranger Officer (ba la shongthait) jong ka Soil & Water Conservation uba long kum u kongsan hapoh madan jong ka St. Ferrendo Higher Secondary School, Sawsymper.
Lah ban kdew ba ka thong bad ka jingthmu ba hakhmat eh jong ka seng ban pynlong ïa kane ka lympung ïalehkai kynjatbol ka long kum shibynta ban pynmih pisa na ka bynta ban ai jingïarap ba pynshna ïing ïa kawei ka longïing ba duk hapoh jong ka dong ka thaiñ Sawsymper bad kumjuh ruh ban kyntiew ïa ka kam ïalehkai jong ki samla jong ha Bri u Hynñiewtrep.
Ki kynhun kiba la pyni ïa ka jingïalehkai ha kane ka sngi ki long ha ka por 12:30 shiteng sngi ka Mawkynroh Football Club bad ka Young Boy’s Football Club ha kaba ka Mawkynroh FC ka la jop da 2 – 0 kol, ha kaba ïa ki kol jong ka Mawkynroh FC la ïoh ban thep da u Disparlin Lyngkhoi haka minit kaba 49 bad da u Janhameshwa Marngar ha ka minit kaba 52 bad uba la ïoh rah ruh ïa ka khusnam kum u ‘rangïalehkai ba kynsai.
Katba ha ka jingïalehkai kaba dei ha ka por 3 baje nohphai sngi pat hapdeng ka Hala-Shlem Football Club bad ka Younger’s United Football Club ha kaba ha kane ka jingïalehkai ka long da shisha ka jingïalehkai kaba itynnad bad ba ïakhaid namar naduh ba sdang haduh kaba kut jong ki minit ym shym la don mano mano ba ïoh ban ïa pynkhih jar wat kawei ruh.
Kumta ban rai ïa ka kynhun kaba jop la hap ban pynïaleh noh da ka Tie Breaker, ha kaba ka Younger’s United FC ka jop da 4 – 2 kol pyrshah ïa ka Hala-Shlem FC bad ïa ka nam ‘rangïalehkai ba kynsai la ïoh da u Banjied Kharnaior jong ka Younger’s United FC.
U bah Rangstarwell Wankhar, Ranger Officer (ba la shongthait) jong ka Soil & Water Conservation haba kren ha ka jingïalang u la pynkynmaw ïa kiei ki kam kiba bha ba kum ka FKJGP Sawsymper Circle lem bad ka jingïadonbynta lang jong u ban kner ki jingïarap sha ki longïing kiba shem jingjynjar ha ki snem kiba la leit noh.
Haba kren ïa ka jingthmu jong kane ka lympung ïalehkai, u bah Rangstarwell Wankhar u la ai ka jingïaroh ïa ka FKJGP Sawsymper Circle kaba don ïa kane ka mynsiem jong ka jingïohi jngai ban leh ei ei na ka bynta kiba duk ba rangli bad u la ai ruh ka jingkyrkhu kyrdoh ïa kane seng ba kan lah tur shaphrang ban leh ïa kine ki kam kiba long ym ka jingmyntoi jong ka seng hynrei ka jingmyntoi ïa kito ki briew kiba donkam ka jingïarap.
