Nongstoiñ, K’Lngkot 05 : La kumba arphewlai sngi ki la ïaid naduh ba uwei u rangbah na ka shnong Marshan kaba hap ha South West Khasi hills u la ïarap ban leit buh ïa kawei ka thuk thuk ha kawei ka karkhana kaba don ha Upper New Nongstoiñ harud ka surok Nongstoiñ Shillong ha jan ka jingkieng ban leit sha Tiehsaw ha mar pyrshah jong ka ophis jong ka Nongstoiñ C&RD Block.
U tei u rangbah u bym kwah ban pynpaw kyrteng ïalade mynta ka lah sngi u Blei ka 5 tarik Kyllalyngkot u la wan ban ïakynduh bad u nongthohkhubor jong u Mawphor ha kaba u la ong ba ha ka janmiet jong ka 14 tarik Nohprah 2025 katba u dang ïeng ha NRL petrol pump New Nongstoiñ ban theh petrol ïa ka kali jong u kawei ka thuk thuk kaba don ïa u Registration number ML05 7335 kaba la ñiah da uwei u briew ba la shon lang bad uwei u para lok kaba la pynher sted bha ka la wan tynrah kynsan ïa ka kali jong u bad katei ka thuk thuk ka la kyllon bad ka la pra ha kaba u nongñiah bad utei u ba shong lang ki la mynsaw.
Utei u rangbah u la ong ruh ba ha kata ka por u la isynei ïa ki bad u la pynkit da ka kali ban leit shim dawai bad hadien kata u la phah tan noh ïa katei ka thuk thuk bad leit buh ha kawei ka karkhana bad ban pah sumar ha u trai jong katei ka karkhana.
Utei u rangbah u la ong ruh ba ha katei ka por um shym la kynmaw ban kylli ïa ka kyrteng bad ka shnong jong utei uba ñiah ïa katei ka thuk thuk bad u paralok jong u hynrei u la shu ïarap bai dawai ïa ki baroh arngut.
Ha kajuh ka por u la ong ba kham hadien haba u la kynmaw u la pyrshang ban wad bad ban kylli tohkit na kitei ki ba mynsaw ba ki dei na ka shnong aïu bad kiei ki kyrteng jong ki.
Kumta khnang ba u trai jong katei ka thuk thuk un tip bad un wan ban ïakynduh ïa u bad ban ïapynbeit ïa ki kam ba don kam u la hap ban pyntip sha ki lad pathaikhubor bad ban kyrpad ïa u trai jong katei ka thuk thuk ba un leit shim noh khnang ba kan ym pynwit ïa kiwei pat ki thuk thuk kiba leit ban phah moramot ha katei ka karkhana.
U la ong ruh ba lada ki kwah ban ïakynduh ïa u ki lah ban phone ha u number 8837265067.
