Shillong, Ïaïong 04: U Myntri ka tnat Tourism u Bah Paul Lyngdoh u la kam ba ki kam jngohkai pyrthei ha ka jylla ka la nang kiew manla ka por lyngba ki khana kiba pher bapher bad ki jingjop jong ki.
“Ïa kane la sakhi da ka jingïoh kyrdan ka nongbah Shillong kum ka nongbah kaba khring bha ïa ki nongwan jngohkai bad ka jingbuh thong ban kyntiew shuh shuh ha kane ka snem 2025 bad ka jingwan jong ki riewpaw khmat na shabar ri ban jngohkai ïa ka jylla kiba kynthup naduh ki nongtem, ki nongrwai bad kiwei kiwei ka la nang kyntiew shuh shuh ïa ka jylla bad ngi la poi sha ka thong ba tang ha Sohra marwei ki la don palat 350 tylli ki homestay kiba la treikam,” ïathuh u Bah Lyngdoh sha ki lad pathai khubor.
U la ïaiban da kaba ong, “Hynrei da ka jingkiew ha ka kam tourism, ngi kwah ruh ban ïohi ba ka jingpynheh ïa ka kad liengsuiñ yn lah ban pyndep nohshen. Ïa kane ka pynthikna da ka jingïalang jong ki myntri ka sorkar pdeng bad u Myntri Rangbah ka jylla bad la kumno kumno hapdeng u snem 2026 ngin lah ban ïohi ïa ka jinglah ban pynheh ïa ka runway ka Shillong Airport ha Umroi ban lah ban pyndep noh.”
“Ka mat kaba kongsan ka long ba Meghalaya, kam dei ka sorkar kaba pyntreikam bad pynïaid ïa kine ki kam shakri hynrei bun na kine la pynïaid da ki shnong. Ki dei ki association bad ki dorbar shnong kiba pynïaid ïa kine ki kam, ki double decker root bridge kiba don ha Nohriat dorbar ki la dei kiwei kiba la khring bha ïa kiba wan jngohkai,” u la ong da kaba bynrap, “Kaei kaba ngi la leh ha ki shisnem ba la leit ki dei ki jingïalang ïasyllok, ba kynthup ïa ki jingai jinghikai bad ki riewshem phang ba kumno kin pdiang ïa kiba wan jngohkai sha kine ki jaka,” bynrap u Bah Paul.
