Ïoh khusnam Best of Indian Journal of Ophthalmology u Prof. Tanie Natung bad ka kynhun

Shillong, Ïaïong 04: U Prof. Tanie Natung bad ka kynhun jong u na NEIGRIHMS ki la ïohpdiang ïa ka khusnam ‘Best of Indian Journal of Ophthalmology Award’ ha ka 40th Asia-Pacific Academy of Ophthalmology Congress ha ka jingialang kaba 83rd Annual Conference jong ka All-India Ophthalmological Society kaba la long naduh ka 3 – 6 Iaïong 2025, ha New Delhi. Palat 13500 ki nongmihkhmat na ki ri bapher bapher ki la ïashim bynta bad ki sam ïa la ki jong ki jingtip ha kaba ïadei bad ki kam saïan, ki jingnang jingtip jong ki ha ki kam wad bniah ha ka APAO-AIOS conference.
Kane ka khusnam kaba kongsan la ai na ka bynta ki kam wad bniah ha ki kam bapher bapher. Na ka liang u Prof. Natung u la ong ba kine ki kam wadbniah kin ïarap ïa ki ophthalmologist ha kylleng ka pyrthei ba kin lah ban leh bha ha ki kam puid nongpang. Na ka liang Dr. Ishita Pandey, Dr. Benjamin Nongrum bad Dr. Ester K Sekhose na ka tnat Ophthalmology NEIGRIHMS ki la ïarap lang ban pule bniah ïa u Prof. Tanie Natung.
Na ka liang u Director NEIGRIHMS, Prof. Nalin Mehta u la ai khublei ïa u Prof. Tanie Natung bad ka kynhun jong u halor kine ki kam wad bniah ha ka tnat ophthalmology.
Ka Asia-Pacific Academy of Ophthalmology ka dei ka met kaba heh tam halor ka Ophthalmologists jong ka Asia Pacific region & All India Ophthalmological Society ha kaba ïadei bad ki kam ai jingsumar bad ka don ruh kumba 27000 ngut ki dkhot.