La kham biang ka lyer ha Byrnihat kam pat hiar na kaba sniew sha kaba sniew tam : CM

Shillong, Rymphang 19 : U Myntri Rangbah ka Jylla Conrad K Sangma mynta ka Lah Sngi U Blei ula ong ba ki kaiphod bad ki jinglum jingtip ba ïadei bad ka jingkhuid ka lyer ha Byrnihat, Ri-Bhoi ki la pyni ba ka la kham biang bad kam pat ju hiar sha u pud na kaba sniew sha kaba sniew tam.
“Wat hapdeng ki kaiphod kiba pyni ïa ka jingkhuid ka lyer kala kham biang, ngim shym la kheiñ sting satia ïa kane ka kam” ong u Conrad haba jubab ïa ka call attention ha ïing Dorbar Thaw Aiñ, kaba la wanrah da u MLA ka Jirang Bah Sosthenes Sohtun ban buh noh ïa ka MSPCB office ha Byrnihat.
Ula ong ba ka Byrnihat ka dei kaba don ha syndah khappud ka Assam bad ki karkhana ki dei kiba don ha baroh arliang u pud.
U Conrad u pyntip ba ka Meghalaya State Pollution Control Board (MSPCB) kala pyndait ïa ki kor, ka ban ai jingkheiñ ïa ka jinglong ka lyer manla ka sngi.
“Namar kata, watla ngim buh ïa ka Branch Office ka MSPCB, ka kor kala don ban peit ïa ka jingjaboh ka lyer” ula ong haba bynrap “Ngi lah ban shong bishar ïa ka jingtyrwa hynrei kumba nga ong ba da ka jingdon ki kor ki bor, ngi lah ban lum jingkheiñ watla kam don ka Ophis hapoh ka thaiñ ruh”.
U Conrad ula ong ba ka MSPCB kan pyndonkam ruh ïa ki kor ka juk mynta ban peit thuh ïa ka jingjaboh jong ka um.