Shillong, Naiwieng 8 : U MP jongka Rajya Sabha u Dr W.R Kharlukhi mynta ka sngi u la ong ba ka sorkar pdeng ka la dei ban shah ban bteng ka tih dewiong liewkhnai ha jylla Meghalaya kumba long naduh mynshwa lada ym pat lah ban sdang ïa kata ka rukom tih da ka stad saian ba mynta.
“ Ngan sa rah ïa kane ka mat hapoh ka Parliament lada ka sorkar kam lah ban sdang tih kat kum ki kor ki bor saian mynta namar balei ba ki paidbah jongnga kin jynjar tang na ka daw ba pulom ka polisi treikam” ong u Dr Kharlukhi.
Haba kylli halor ka jingktah jongkata ka jingtih dewiong liew khnai ïa ka mariang, u MP u la ong “ Hynrei ki don ki khep pat ruh kiba ngi dei ban phai kaei kaba kham kordor ka jingim briew ne kiwei pat. Lada phi ong ba ka jingim briew kam long kaba kordor kata ka biang bad lada phi ñiew ba ki jaidbynriew riewlum kim long kiba kordor ruh ka biang hynrei kynmaw wat shu pynsah umdum ïa ki briew jong ngi”
U la ong naduh u snem 2014 ba ka NGT ka la khang dam ïa ka jingtih dewiong liew khnai ha Meghalaya, ka sorkar pdeng bad sorkar jylla kim shym la leh ei ei ruh ban sdang da kata ka rukom tih kat kum ki kor ki bor saian ba mynta haka jingshisha ki la dei ban pyni ba ki shim khia halor kane ka kam.
“Nga ïohi ba la shu pynjynjar bad pynsohsat ïa ki briew nalor ba ngi khlem leh bakla ei ei ruh. 40 snem ka jingtih dewiong liew khnai ka la ïaid hynrei dang tang mynta la ïohi ba ka ktah ia ka mariang. Balei kim tip ne ïohi ïa kata ka rukom tih dewiong liew khnai kaba la bteng ha Meghalaya da ki phew snem” ong u Dr. Kharlukhi.
Haba kren bynniaw halor kane u Dr. Kharlukhi u la ong “ Naduh u snem 2014 haduh mynta kata ka rukom tih dewiong kat kum ka jingstad saian kam pat sdang. Ka sorkar pdeng bad sorkar jylla kim pat sdang kumta haba kumne mano ba bakla. Ki la dei ban shim khia ban btin lynti ïa ki paidbah namar ka jingduh nong ka la long kaba jur bha haduh katta katta.
U la ong ka sorkar ka la dei ban sdang ban bishar bniah la kata ka rukom tih dewiong kat kum ka stad saian kan ïarap ne long ne em ha ka jylla.
Mynta la phra snem naduh ba la khang ha u 2014 ym shym la leh ei ei ruh em bad ki paidbah ki la nang jynjar jynjar, ong u MP. Hooid ka sorkar ka la pyrshang ban ïasaid ha ïing bishar halor kane hynrei ka jingthmu ka long ba dei ban shah la kumno kumno ruh ban dang bteng kaba rukom tih naduh hyndai hynthai.
