K a Police Battalion ka dei kawei na ki lad ban pynïoh kam ïoh jam ïaki spah bad hajar ngut ki khun samla, hynrei ha kane ka jylla Meghalaya mynta la bun bun snem ym shym la ïoh shuh ïa ka Police Battalion ba thymmai.
50 snem ba ka jylla ka la ïoh ïa ka jylla ba pura, hynrei ngi dang don tang hynriew tylli ki battalion bad kawei ka SF 10 katba lada ïa nujor bad kiwei kiwei ki jylla kane ka thaiñ ki la don da ki phew phew battalion ki pulit jongki bad kane ka la ïarap ban ai kam ai jam ïa ki hajar hajar ngut ki khun samla kynthei bad shynrang. Ha Meghalaya ka jingkyrduh kam ki khun samla ka la nang kiew na uwei u snem sha uwei pat katba ka sorkar ka khlem khih khohreh ban leit pan police battalion na ka sorkar pdeng. Ban da dei ba shim khia ban leit pan bad leit bud dien katta lehse la lah ban poi sha ka khyndai bad shiphew battalion bad kane khlem pep ka la ïarap ban ai kam ai jam ïa ki hajar hajar ngut ki khun samla.
Hooid lada phai sha ka jinglong jingman ka suk ka saiñ ym lah ban len kane ka la sdang ban wan phai ha ka jylla hadien ba ki seng kieng atiar ki la kloi ban wan sha ka miej jingkren ïasuk hynrei wat la katta ka sorkar ka donkam ban don ki police battalion ban ai kam ai jam pat ïa ki khun samla.
Kumba ka long ka Battalion kaba khatduh ba la seng nongrim ha ka jylla ka dei ka 6th MLP IRBN kata ha u snem 2012. Hadien kane sa shu mih ka SF -10 lait nangta ym don battalion ba thymmai shuh. Kane ka sorkar ka la dei ban leit ïakren sha Delhi shwa ban long ka election ban ïoh ïaka Battalion ba thymmai. Ki District ki la nang bun, ki Police Station ki la nang bun nang bun katba ki pulit pat ki dang duna bha. Namar lada ym don shuh ki seng kaikhlaw hynrei ki don kiwei kiwei pat ki kam runar kiba pynthut ïa ka imlang ka sahlang. Kum ki kam ïa pyniap briew, kam tuh kam lute, kam shah lehbeijot ki kynthei khynnah bad kiwei kiwei. Ki pulit ki donkam bha ban bun bad ban ïoh por bha ban tohkit bad bud dien. Namar ym lah ban len ha kane ka jylla tang shu lait u nongleh kam sniew na kti ki briew ne tang shu ym don ba lap ne ïohi uei uba leh ïa ka kam runar ne kam pyniap briew tang katta ym lap dien shuh. Peit kum ka jingshah pyniap ki khynnah skul haduh mynta ym pat lap dien ïa ki runar kiba leh ïa ka kam.
Ha kiwei kiwei ki jylla ka jingtohkit ka biang bha namar lada ka shim por da ki snem ruh ha kaba khatduh ki pulit ki lap dien beit ïa ki briew kiba ïadonkti. Hynrei hangne ha jylla lada ym tip hi uei uba leh tang katta la eh ban bud dien. Kaei ka daw ka daw baroh ka long ba duna ki bor pulit ki juh ki pulit ki hap ban ïaktait lut ia ki kam. Lada dei ha kaba peit iaka shongsuk shongsaiñ ruh hap mih madan da ki juh lada dei ha ka kam tohkit ruh hap leh da ki juh.
Kumta khnang ba ka jingtohkit bad bud dien kan long janai bad bniah ka sorkar ka la dei ban dang pynbun shuh shuh ïa ki battalion ha ka jylla. Namar lada bun ki pulit la lah ban phiah ïa ki briew ruh ban leh la ki jong ki jong ki kam ym shuh ban shaniah beit haki juh.
Lada bun ki pulit Battalion ka sorkar jylla ka lah ban pan na ka sorkar pdeng wat sa ka regiment ruh namar lada don lei lei sa ka regiment ki samla ym tang ba kin ïoh kam ïoh jam hynrei kin peit hi ma ki ïa ki kam ba peit da kiwei ki paramilitary kum ki CRPF. Lada ïoh ïa ka Meghalaya Regiment lehse tang kine ruh ki la lah ban peit ïa ka jylla ban ïarap ïaki bor pulit ym donkam shuh ïa ki CRPF ruh bad kane kan pynsuk namar ïasngewthuh ïa ka ktien ka thylliej ruh. Kumta ka sorkar ka dei ban buh thong ïakine ki ar tylli ki mat kata ïa ki police Battalion bad ïa Meghalaya Regiment ban ai kam ai jam ïa ki samla. Hooid ban shu ong ki samla ki dei ban ïeng hala ki kjat ka suk hynrei lada ym plie ka lad lada ym don jinghikai, bei pisa tyngka ïa ki kumno keiñ kin ïeng ha la ki kjat ki hap hi ban phai khmat sha ki kam sorkar bad kane ka dei kawei na ki lad bah ban ai kam ai jam ïa ki samla.
