Kan long ka jingkyrkhu na ka bynta ki 71 tylli ki shnong jong ka thaiñ: Kimfa

Plie u MLA Rambrai Jyrngam ïa ka Ri Muliang C&RD Block

0

Nongstoiñ, Naiwieng 22: Ïa ka jingplie ïa ka C&RD Block kaba saw ha West Khasi Hills District, ba la ai kyrteng ka Ri Muliang C&RD Block, la plie mynta ka sngi da u MLA jong ka Rambrai Jyrngam Bah Kimfa S Marbaniang MLA, ha ka jingdon ryngkat u MDC Bah Bajop Pyngrope, u Joint Director C&RD Block Bah JE Massar, ki riew paw khmat jong ka District West Khasi Hills, ki nongsynshar shnong bad ki riew paidbah ha ka jingalang kaba long ha madan jong ka shnong Nonglang.
Haba ai jingkren ha ka jingïalang, u kongsan Bah Kimfa S Marbaniang, u la pynpaw ïa ki kyntien ai khublei bad ïaroh ïa ka sorkar, da kaba ong ba kane ka sorkar ka dei kaba kloi ban sngewthuh ïa ka jingdonkam jong ki paidbah ka thaiñ. U la ong ba baroh shikatta ka la pynlong ïa ki paidbah ban shem shitom, namar ki hap ban leit shaduh Mawshynrut na ka bynta ki kam ki jam. Hynrei, ka jingplie ïa kane ka Block thymmai kan long shisha ka jingkyrkhu ïa baroh ki 71 tylli ki shnong jong ka thaiñ.
U la ong ruh ba kan long ka sngi sah kynmaw ban plie ïa kane ka Block, namar ka dei ka sngi jingkyrkhu ban kyntiew ïa ka ïoh ka kot jong ki paidbah bad kane u ong kan kyntiew ïa ka jinglong jingman ha ka rukom im. U la kyntu kyrpang sha u BDO ban sa shimti ïa ka kam, ba un shimkhia lem na ka bynta ka jingmyntoi jong ki paidbah nongshong shnong. Ha kajuh ka por u la khot la wer sha ki paidbah ka thaiñ, ban ïatreilang bad ka sorkar lyngba ki nongtrei jong ka Block thymmai na ka bynta ka lawei ba phyrnai jong ka dong ka thaiñ.
Nalor kaba plie ïa ka Ri Muliang C&RD Block, la sam ruh ïa ka Chief Minister’s prokam lyngba ka FOCUS bad FOCUS+, YESSS, NRLM CIF, Rabi Seeds & Bio Chemical Fertilizers. La sam ruh ïa ki Cheque sha SHGs, Cooperative Societies, ki nongri sniang nongri syiad bad kiwei ki nongïoh jingmyntoi.
Kiwei kiba la ai jingkren ha kane ka jingïalang ki long u Bah HK Thabah ADC, u ba la ai ruh ïa ka jingkren pdiang sngewbha, nangta u Bah EM Marak u ba la mih khmat na ka Ri Muliang C&RD Block, Bah Bajop Pyngrope MDC, Bah JE Massar u ba la pynbna ïa ka jingpynbna na u Lat ka Jylla bad na u Bah GH Passah BDO Ri Muliang Block, u ba la ai ïa ki kyntien ai khublei. Ha kane ka jingialang, la pynlong ruh ka jingsngap jar ba shi minit halor ka jingjia sngewsih, kaba la jia ha ka shnong Mukroh West Jaiñtia Hills District.

Leave A Reply

Your email address will not be published.