La buh ïa ki Police Outpost ha baroh ki jaka khappud ba hap ha ka jingpeit ka Meghalaya : Conrad

Shillong, Risaw 10 : U Myntri Rangbah ka Jylla, u Conrad K. Sangma u la ong ba ka Sorkar Jylla ka la buh ïa ki Police Outpost ha baroh ki jaka kiba don hapoh ka jingpeit jong ka Meghalaya ha ka thaiñ khappud bad Assam, bad dang don shuh shuh ki outpost kiba dang pynkhreh.
U la kyntait ïa ki jingkynnoh ba ka Sorkar ka tieng ne ka khlem shimkhia ïa ka jingshngaiñ ha khappud, da kaba ong ba kane ka jingkynnoh kam long satia kaba dei.
“Ha baroh ki jaka kaba hap ha ka jingkhmih jong ka Meghalaya, ngi la buh ïa ki outpost. Don kiba dang ïaid ka kam, don ki jaka ba ngi dang wad ïa ki briew ban trei, don ruh ki jaka ba ngi dang pynbeit ïa ka jaka ban buh ïa ki outpost, katba ha kiwei pat ngi la sdang ïa ka kam,” u la ong.
U Myntri Rangbah u la bynrap ba ka Sorkar ka la buh ïa bun tylli ki Border Outpost bad ka dang pynkhreh ban buh shuh shuh ha kiwei ki jaka.
U la pynthikna ba ha baroh ki jaka kiba don hapoh ka jingpeit jong ka Meghalaya, ka Sorkar kan shim ïa ki sienjam kiba donkam ban pynthikna ïa ka jingshngaiñ bad ka jingïada ïa ki paidbah kiba sah ha kitei ki thaiñ.