Shillong, Risaw 10 : U nongïalam ba rangbah ka BJP bad MLA ka Pynthorumkhrah, Bah AL Hek u la ong ba ka jingkiew ki kam runar ha ka jylla ka dei na ka daw jong u drok.
Kumta halor kane, u la kyntu ïa ka sorkar jylla ba ka dei ban shim ïa ka jingkitkhlieh kaba pura ban weng ïa kane ka jingeh.
“Ki kam runar kiba bun ki jia namar ka jingjyllei palat ki briew kiba dih drok. Kumta, kane ka dei ka jinglong kaba ma bha,” ong u Bah Hek haba kren bad ki lad pathai khubor.
Shuh shuh u ong ruh ba ka sorkar jylla naduh u Myntri Rangbah bad u Myntri ka tnad ka Koit ka Khiah ki dei ban shim ïa ka jingkitkhlieh ban peit kumno ban tehlakam ïa kane ka jingeh kaba mih na ka daw jong u drok.
“Ym dei shuh tang kawei ka longïing mynta, hynrei bun ki longïing bad ki kmie ki kpa ki shah ktah haba ki ïohi ba uwei na ki dkhot ka longïing jong ki u la ngop ha ka jingkyrni ha u drok. Kumta kane ka long kaba ma bha ïa ka imlang sahlang jong ngi.Dei na kane ruh ba ki kam runar ki la bun,” u la ong.
Ha kajuh ka por ruh u la ong ba ki kam runar ki la bun bha ha ka jylla Meghalaya. “Mynshwa ngi la ïohi ïa ki jingjia ha Nongmynsong, kaba hap hapoh ka constituency jong nga, bad ha kiwei pat ki constituency bad ki bynta bapher bapher jong ka jylla Meghalaya.Kumta kane ka jingeh kaba mih na u drok ka dei ruh kawei na ki daw jong ka jingkiew ki kam runar,” u la ong.
Haba la kylli kaei kaba ka sorkar ka dei ban leh, u Bah Hek u la ong ba ka sorkar ka dei ban shim ïa ka jingkitkhlieh kaba pura ban pynthikna ban rat dyngkhong ïa u drok na ka jylla.
U la ai jingmut ruh ïa ka jingdon bynta jong ka shnong ha ka jingïakhun pyrshah ïa ka jingpyndonkam drok.
“Kawei na ki sienjam kiba ngi lah ban shim ka long ban trei lang bad ka Dorbar Shnong bad ki volunteer jong ka Dorbar Shnong. Lada ngi lap ïa kino kino kiba pynmih jingkulmar namar ka jingngop ha ka jingpyndonkam drok, ngi dei ban shimkhia ïa ka mat bad ïaleh ban pynbeit ïa ka.
Ngam ong ba dei ban pynshitom ne pynshitom da ka kuna, hynrei dei ban pynthikna ba kin ym bteng biang ïa kum kine ki jinglong kiba ïadei bad ka jingpyndonkam drok,” u la ong.
U Bah Hek u la pynpaw ruh ïa ka jingdonkam ban peitngor ïa ka jingïadei paralok, namar ki samla ki lah ban ngop ha ka jingpyndonkam drok namar ka jingïasngewjan bad ki paralok.
“Ngim lah ban shu kynnoh ïa uno uno. Hynrei ka dei ka kamram jong ki kmie ki kpa ban shimkhia, ki nongshong shnong kiba shimkhia bad ka sorkar kaba shimkhia ban tehlakam ïa kane ka jingpyndonkam drok, bad ban pynthikna ruh ba dei ban rat dyngkhong ïa ki kam runar kiba mih na ka daw u drok,” la bynrap biang u Bah Hek.
