Shillong, Nailur 14: Ka Holy Cross Parish Mawkynrew ha ka Sngi U Blei ka la rakhe ïa ka Parish Day kaba 39 snem, ha kaba ki paid riewngeit na kylleng ki shnong hapoh ka Mawkynrew Sub-Division ki la wan ban ïashim bynta shitrhem.
Ïa kane ka Parish la seng ha u snem 1987 bad la pynïaid da ki Lyngdoh jong ka Congregation of Holy Cross (CSC), kiba la shakri ïa ki jingdonkam ba kynja mynsiem bad pynïaid ïa ki kam niam jong ki paid Katholik ha katei ka thaiñ.
Ïa ka Mass Bakhuid la ïalam da u Most Rev. Bernard Laloo, Auxiliary Bishop ka Shillong Archdiocese, kum u kongsan ha ka kñia Mass. La synran lang ïa u da u Parish Priest, Fr. John Valan CSC, bad u Assistant Parish Priest, Fr. Arul Jenathan CSC.
Ha ka sneng ka kraw , u Bishop Bernard Laloo u la kyntu ïa ki riewngeit ba kin ïaineh skhem ha ka jingngeit, pynneh ïa ka jingïatylli hapoh ki ïing ki sem bad ka imlang sahlang, bad ban pynpaw ïa ki jinghikai Khristan lyngba ka jingieid, ka jingshakri bad ka jingïasngewthuh jingmut.
Ha kane ka sngi kyrpang, u Bishop u la sam ïa ka Communion Bakhuid sha 40 ngut ki khynnah kiba la pdiang nyngkong eh ïa ka Met bad ka Snam U Khrist. Kumjuh ruh, haduh 150 ngut ki khun samla jong ka Parish ki la pdiang ïa ka Sakrament Jingpynskhem.
Kane ka jingrakhe ka la long ruh ka lad ïa ki paid u Blei ban pynpaw ïa ka jingsngewnguh halor ka jingshakri jong ki Holy Cross Father bad jong baroh kiba la noh synñiang ha ka jingïaid lynti kaba 39 snem jong ka Parish.
Hadien ka Mass Bakhuid, la pynlong ïa ka jingïalehkmen Parish Day, ha kaba ki paidriewngeit ki la ïashim bynta shitrhem ha ki prokram bapher bapher. Ka jingrakhe ka la pynpaw ïa ka jingngeit kaba skhem, ka jingïatylli bad ka mynsiem jingsngewnguh jong ka Balang.
Na ka liang ka Parish Pastoral Council (PPC) ka la pynkup burom bad ithuh ïa ka jingshakri jong ki nongtrei Balang, kiba kynthup ïa ki Lyngdoh, ki riewniam shynrang bad kynthei, ki rangbah Balang bad baroh kiba la trei shitom na ka bynta ka jingroi bad jingkiew shaphrang jong ka Holy Cross Parish Mawkynrew.
Ha kane ka prokram la wan ban shim bynta da kiba bun byllien ngut ki paid riewngeit ha kaba ka jingleh niam ka la long ruh kaba shongkun bad kaba phuh ba phieng.
