Khliehriat, Risaw, 08: Ka public hearing jong ka Star Cement Lumshnong ba la pynlong ha ka sngi Baar ha ka shnong Brichyrnot, East Jaiñtia Hills District ka la ïaid beit haduh kaba kut, lah ban ong ba 95 percnet ki dei kiba la ai ka jingkyrshan bad 5 percent pat kiba pyrshah.
Kane ka jingpynsgew paidbah ka dei halor ka jingthmu jong ka company ban khlong ïa u mawshun na kawei ka par kaba don ha shnong Brichyrnot na ka par kaba heh 65 hectar, ïa ka public hearing la khot pynlong bad pyniaid da ka tnat Meghalaya State Pollution Control Board ha ka jingdon ryngkat lang u ADC East Jaiñtia Hills District, u bah G.Warjri, MCS, ki Environmental Engineer ka tnat MSPCB u bah S.Syiem bad u bah Y.F.Laloo bad kiwei kiwei.
Kiba la ai jingkren ha rynsan ki don haduh laiphew ngut kynthup ruh katto katne kiba pyrshah ïa kane ka project ba kynthup ka Khasi Students Union Narpuh Circle ba la lam khmat da u President, u bah K.S.Suchiang, ka kong Bythygrace Dkhar kaba na ka shnong Moolamanoh bad kiwei kiwei, hynrei kiba bun ki dei kiba ai ka jingkyrshan ïa ka company Star Cement.
Na ka liang u Waheh Shnong jong ka shnong Brichyrnot, u bah Stanly Masar, u la ong ba ha kaba iadei bad kane ka project jong ka Star Cement na ka liang ka shnong ka la dep mynjur bad ai ka jingkyrshan ïa ka company.
U Secretary Elaka Narpuh, u bah S.Sumer uba la ai ka jingkyrshan ïa ka company Star Cement bad u la kyntu ba ka company ka dei ban pyrkhat ha ka liang ka iohkam iohjam jong ki nongshnong shnong Brichyrnot bad ruh ban thep kam ïa ki briew jong ka elaka bad dei ban da peit bha ba kane ka project ha Brichyrnot kan long ka jingmyntoi ia ki briew ka thaiñ.
Na ka liang u WS Deingshynrum, u bah Wilbert Nongtdu, u la ong ba ka company Star Cement kaba lyngba ki kam pynroi na ka tnat CSR ki qanrah bun ki jingiarap bad jingmyntoi ïa ki paidbah kumta u la ai ka jingkyrshan ba pura ïa ka Star Cement.
Kiwei kiwei ruh kiba ai jingkren ba kynthup u Secretary Shnong Brichyrnot, u bah Tariang Masar, u bah Rowel Sumer, u bah Friendly Nongtdu, u Waheh Shnong Pyrtakuna, u bah Loveyou Bareh, u Assistant Waheh Shnong Lumshnong, u bah C.Rymbai, u MDC barim uba na shnong Ratacherra, u bah D.Pohshna, u bah Grimlang Dkhar bad kiwei kiwei, kiba la ai jingkyrshan ki kyrpad ruh ïa ka tnat ba dei peit ba kan sngewbha ban ai ïa ka Clearance ïa ka company Star Cement ba kan ioh ban sdang noh ïa ka kam ban khlong mawshun na kane ka par kaba don ha shnong Brichyrnot.
Katba kiba pyrshah ki kynthup ïa u Bah K.S.Suchiang, ka Kong Bythygrace Dkhar ki la pynsngew ïa la ki jong ki nongrim halor ka jingpyrshah jong ki ia ka Star Cement ban khlong ïa u mawshun na ka par ba don ha Brichyrnot.
Na ka liang u Bah K.S.Suchiang u la ong ba na ka liang ka seng ka la dep ban buh da ka jingthoh shaduh u Member Secretary jong ka tnat MSPCB bad pynpaw ba ka jingthih mawshun jong ka company Star Cement kan ktah ïa ki um ki wah khamtam ka wah Lunar bad ka wah Lukha bad kynthoh ruh ba dei na ka daw ka jingtih mawshun ba ki um ki wan ki kylla sniew bad buh jingma ruh ïa ki mrad kiba don ha ka khlaw Wildlife Sanctuary kaba don ha Narpuh.
Na ka liang ka Star Cement pat, ïa ka jingbatai kaba bniah ha kaba iadei bad kane ka project tih mawshun ha Brichyrnot la pynsngew da u AGM-EHD Depar-tment, u bah Rangkynsai Rynjah bad ïa ka prokram la pyniaid da u Environmental Engineer ka tnat Meghalaya State Pollution Contrrol Board, u bah Y.F.Laloo.
