Jowai, Nailur 19: Ka Jaiñtia Students’ Movement (JSM) (Western Region) ryngkat ki nong ïalam CEC mynta ka sngi kila leit kyrshan lem ïa ki nongïalam shnong ka Lapangap ban ïa kynduh markhmat ïa u Deputy Commissioner ka West Jaiñtia Hills ha ophis treikam jong u haka jingïadonlang u Superintendent of Police ka District.
Kitei ki nongïalam shnong kila ïoh ban ïatai sani bha halor kumno ban wanrah biang ïa ka jingshong suk shong saiñ ha ki jaka khappud jong ka shnong Lapangap khnang ban lait na ki jingshah pyndik manla ka por haki nong Karbi (Assam).
Naka liang ka Shnong ka la ai ruh ka jingthoh halor ka jingshah pynwit haki Karbi khamtam ha ki por ba leit rep leit riang namar ba la jan ka por ban ot noh ïa u kba u khaw.
Ha kane ka sngi kila buh ruh ka jingthoh ha u DC halor ka jingshah pyndik ki Pnar kaba la jia manla ka por bad ka jingshah pynjulor jong ki mar rep kumjuh ïa ki ïing trep lyngkha bad kiwei de.
Halor kane naka liang u Deputy Commissioner West Jaiñtia ula kular ban pynsngew ïa kane ka jingeh jong ki sha ki bor ba halor bad ban ïa kynduh noh baroh arliang mamla ban pynsuk ïa ka rep ka riang ha katei ka thaiñ khappud (Border).
Na ka liang ka JSM ka kyrpad jur ïa u DC ba un sngewbha ban kitkhia halor kane bad ban phah noh mardor daki Central force ban buh jingïada ïa kitei ki Nongshong Shnong ba don ïa kitei ki lyngkha ha khappud bad lada ki bor ba halor kim lah ban leh eiei, naka liang ka JSM bad ka Dorbar Shnong kin sa wad ki lad da kumwei pat khnang ban ïoh ot ïa u Kba u Khaw ha katei ka jaka.
Shuh shuh ka seng kala kren shai lada ki bor ba halor kim lah ban leh ïa kaba donkam na ka bynta ka jingshngaiñ jong ki paid Pnar ba sah ha khappdud ki lah ban shim ïa ka jingkitkhlieh lada jia eiei ong ka JSM.
