Kyrshan ka BJP bad Barabazar Shopkeeper’s Association ban khang dukan ha ka 28tarik

Shillong, Ïaiong 26 : Ka BJP Meghalaya kaba la mih nyngkong eh ban pynlong ka jingpyrshah ïa ka jingshah siat ïap bein ki nongjngohkai pyrthei ba lui lui ha Pahalgam, ha ka sngi Saitjain ka la ai ka jingkyrshan kaba pura ïa ka sienjam ba shim da ka Shillong Citizen Forum.
Na ka liang u General Secretary ka BJP Meghalaya, Bah Wankitbok Pohshna u la ong, “Ka party jongngi ka shim ba kadei ka kam kaba kyntang ban don bynta lang ha ka jingïakhun ban wanrah ïa ka jingïatylli ha ka ri. Ngi don ka jingsngewlem na ka bynta kito ki longiing kiba la duh noh ïa ki baieit ba thoin jong ki ha ki kam pyntriem. Kumta ïa kum kine ki kam thombor ym dei satia ba kan shu jah kumto khlem da shah pynshitom.”
“Na ka liang ka party ka kyrshan ruh ïa ka jingkhot khang ïa ki dukan bad ki jaka kamai ha Greater Shillong ha ka 28tarik Ïaiong. Hynrei na ka liang ka BJP ka kyntu ba ïa ki dukan rit ban pyllait noh namar ba kan ym ktah than ïa ka kamai kajih jong kito kiba kamai jaka na ka bylla sngi,” ong u Bah Wankitbok.
Ka long kaba sngewtynnad ba ki nongshong shnong ka Shillong ba ki mih shakhmat ban snohkti lang bad ki paidbah ka ri baroh kawei khnang ba ki nongkam bymman kin ïoh ïa ka hok bad ruh ba kan long ka khubor ïa ki lehnoh kiba na sha shilliang pud.
Na ka liang ka party ka la kyntu ruh ïa ka Mahila Morcha bad ka BJYM ba kin snohkti lang ha katei ka jingthang mombati sngewlem ba la khot pynlong da da ka Shillong Citizen Forum ha ka 27tarik Iaiong khnang ba ka sur jong ka jingdawa ïa ka hok kan sawa jam.
Ha kajuh ka por ka Barabazar Merchant’s and Shopkeeper’s Association ki ai ka jingkyrshan ïa ka Shillong Citizen Forum na ka bynta ka rai ban khang dukan bad ki jaka kamai ha ka 28tarik mynta u bnai kum ka dak ka jingpyrshah jur ïa ka jingshah pynïap bein ki briew kiba lui lui ha kti ki lehnoh ha ka 22tarik mynta u bnai.