Shillong, Rymphang, 19: Ka ophis District TB Officer, Ri Bhoi District ka la sam da ki marbam hapoh ka Pradhan Mantri TB Mukt- Bharat Abhiyan sha ki nongpang TB ba la pynlong ha Byrnihat PHC ba la noh synñiang da ki Manager jong ki ar tylli ki karkhana ba la tip kyrteng kum ka Shyam Century Ferrum Ltd bad ka Maithan Alloy Ltd. Kane ka jingkyrshan marbam ïa ki nongpang TB kan long na ka bynta 6 bnai.
Ka District TB Officer, Ri-Bhoi ka Dr. E. Kalwing haba kren ha kane ka jingïalang ka la ïathuh shaphang ki sienjam jong ka Sorkar India halor ka Pradhan Mantri TB Mukt Bharat Abhiyan, ka skhim ba thymmai kaba ai jingïarap marbam sha ki nongpang TB kiba dang don hapdeng ka jingshah sumar lyngba ka jingkyrshan jong ki riewshimet bad ki kynhun bapher bapher.
Ka Dr. Kalwing ka la bynrap ba ka Ministry of Health and Family Welfare ka la pyntreikam ïa ka National Strategic Plan da kaba buh hakhmat ïa ka thong ban pynkut noh ïa ka jingpang TB ha u snem 2025.
Khnang ban pynurlong ïa kane ka thong, ka Ministry of Health and Family Welfare ka la khot bad wer ïa ki parabriew ha ka imlang ka sahlang ban ai jingkyrshan sha ki nongpang TB. Ki Nikshya Mitra lane ki nongkyrshan ki kynthup ïa ki Cooperative Society, ki Cooperate, ki nongmihkhmat, ki riewshimet, ki sengtreilang, ki seng saiñpyrthei kiba lah ban ai jingkyrshan ïa ki nongpang TB khnang ban pynkut ïa ka jingpang TB hapoh u snem 2025.
U Manager jong ka Shyam Ferrous Century Ltd, u Rama Krishna u la ong ba ki nongpang TB ki donkam ïa ki jingbam teimet ban ïakhun pyrshah ïa ka jingpang. U la bynrap ruh ba u la pynsngewthuh sha kiwei pat ki Manager jong ki karkhana ban wan shakhmat ban ïarap bad ban kyrshan ïa ki nongpang TB da kaba ai jingïarap da ki jingbam teimet hapoh ka PMTBMBA program.
U nongmihkhmat na ka Maithan Alloy Ltd, u la ong, ban pynkoit ïa ka jingpang TB, ban dih ïa ki dawai kiba rem dor kam pat biang hynrei donkam ruh ïa ki jingbam kiba pynkhlaiñ ïa ka bormet. U la ong ba u sngewkmen ban long u nongkyrshan bad ban ïohi ïa ka khmat ba phuh sam rkhie jong ki nongpang TB.
Ka District TB Officer office, Ri Bhoi District ka la khot bad wer ïa ki paidbah nongshong shnong ban ïasnohkti lang na ka bynta ban pynkut noh ïa ka jingpang TB ha ka District da kaba mih shakhmat ban kyrshan ïa ki nongpang TB khnang ban dup pynurlong ïa ka thong ban pynkut ïa ka jingpang TB shwa u snem 2025.
Ha kane ka jingïalang la sakhi lang da u Medical and Health Officer, Byrnihar PHC u Dr. Johny Marak, ki nongmihkhmat na ka Shyam Ferrous Century bad Maithan Alloy Ltd, ki nongtrei ka koit ka khiah jong ka Byrnihat PHC bad na ka District TB Office, Ri Bhoi District.
