Shillong, K’ Lyngkot 16: U CEM ka Jaiñtia Hills Autonomous District Council (JHADC) u Bah Thombor Shiwat u la kyrpad ïa ka jingtuklar jong u Symbud Myntri Rangbah ka jylla u Bah Sniawbhalang Dhar ban pyllait noh ïa ka pisa T. 50 klur kum ka advance napoh ka bhah ne ka royalty share haba ïadei bad ki mar kiba heh bad ki mar kiba rit (major and minor minerals) khnang ban lah ban pyllait noh ïa ka tulop kaba 12 bnai jong ki MDC, ki officer bad ki nongtrei jong ka council.
Ha ka shithi ba la phah sha u Bah Dhar, u Bah Shiwat u la pynpaw ka jingïaroh bad ai khublei halor ka jingshim khia jong u ban pyllait ïa ka pisa kaba long T. 13.80 klur napoh ki Major Mineral sha kane ka council.
“Ha kaba ïadei bad kane, nga kwah ban pyntip shaphi ba ka pisa ba la pyllait da ka sorkar kam pat long kaba biang ban pynkhuid ïa ka tulop jong ki nongtrei,” u la ong.
U la pyntip ruh ba ka tulop jong ki officer bad ki nongtrei la dep ban pyllait tang haduh u bnai Rymphang u snem 2024, katba ka tulop jong baroh ki MDC, ki Pensioner bad ka family pension holder la dep ban pynkhuid tang haduh u Kyllalyngkot u snem 2024.
“Kumta ka tulop kaba dang sah la donkam ban pynkhuid da ka Executive Committee kaba kynthup ïa ka tulop ki Officer bad ki nongtrei kaba dei naduh u bnai Lber 2024 haduh u bnai Rymphang, 2025. Nangta ka tulop ba dangsah jong ki MDC, Pensioner bad Family Pension holder kaba dei naduh u bnai Rymphang 2024 haduh u bnai Rymphang u snem 2025,” u la ong.
“Na kine ki jingshisha kiba la kdew haneng, ban pynlah ïa kane ka Executive Committee ban pynkhuid ïa baroh ki tulop kiba dangsah ha shwa ka jingpynlong ïa ka elekshon MDC 2025, ha ka kyrteng jong ka Executive Committee da ka jingkyrpad kaba rit ngi kyrpad ba dei ban pyllait noh ïa ka pisa kaba T. 50 klur kum ka pisa advance bad ban pyniabiang pat na ka share jong ki major mineral, minor mineral bad ka khajna ïa ki kali kaba la lum ha ka snem 2024-25,” ong u Bah Shiwat.
“Namar kata, ngam don lynti da kumwei pat hynrei ban wan sha ka ophis jong phi da ka jingkyrpad ban pyllait noh ïa katei ka pisa kaba la kdew haneng kham kloi katba lah khnang ba kane ka Council kan lah ban siew ïa baroh ki tulop kiba dangsah,” ong u CEM ha ka shithi sha u Symbud Myntri Rangbah.
