Shillong, Lber 17: U Bah Process T Sawkmie, u MLA barim hynne ka sngi u la kyrpad ïa u Myntri Rangbah ka jylla u Conrad Konkal Sangma ba un ïarap lem ïa ki samla kamai scooty kiba ha Shillong ba kin ïoh ïa ka permit kaba biang.
“Nga kyrpad ïa ka sorkar hapoh ka jingïalam jong u Conrad K. Sangma kum u Myntri Rangbah ka jylla ba kan ïarap lem ïa ki samla kamai scooty kiba ha Shillong ba kin ïoh ïa ka permit kaba biang, khnang ba kiba kamai scooty kin ïoh ïa ka kamai kajih kaba biang,” ong u Bah Sawkmie bad u la bynrap, kumba na ka liang jong ki, ki la submit ïa ka jingdonkam baroh sha ka sorkar, u kwah ba na ka liang u Myntri Rangbah un ïarap lem ïa ki.
U la pynpaw ruh, kumba ha kine ki sngi u Myntri Rangbah u la sam ïa ki shithi thungkam (appointment letter) sha kiba bun ki samla ha ki tnad treikam (department) bapher bapher.
Na ka liang u ïah Sawkmie u kwah ruh ba ki kamai scooty ha Shillong kin ïoh ïa ka permit bad kane kan ïarap shuh shuh ïa ka thong jong ka sorkar ban aikam ai jam ïa ki samla.
Shuh shuh ka sorkar ka la thaw lad ïa ki samla, ha ka liang ka sports bad ka put ka tem kumjuh kan peit ruh ïa kiwei pat kiba don la ka jong ka bynta.
