Shillong, Nailur 1 : Ka Hynniewtrep Integrated Territorial Organisation (HIYO) mynta ka Sngi Ba Ar ka la kyntu bad kyrpad ïa ki bor ba halor ka BSF Meghalaya Frontier ba kin pynrung kam bun ïa ki samla khnang ba ym tang ba kan ïarap ïa ka jingïoh kam ïoh jam hynrei kin ïoh ruh ban ïada ha khappud namar kum ki trai shnong ki kham tip hangno ba dei ban pyrkhing bha ka jingpahara ban ym ïoh wanrung tuh ki khar Bangladesh shapoh u pud u sam ka ri.
Ha ka dorkhast sha u Inspector General u OP Upadhyay u President ka HITO u bah Dobok Dkhar u la ai ka jingïaroh ïa ki BSF ka ka tnad kam pohïing jongka sorkar pdeng kiba la pynrung kam ïa kiba bun ki samla ha u snem 2025 namar kane ka la ïarap bad ai jingmyntoi bha ïa ki samla jongka jylla.
Haba ai jingïaroh halor kane ka jingleh ka HITO ka la ong “ Ngi ai burom ïa kane ka jingpynrung kam kaba la leh na ka bynta ki samla trai jylla ha u snem 2025 namar kiba bun ki samla ki la ïoh ban rungkam ha ka BSF”
Ka Seng ka kyntu namar kata ban pynlong biang ïa kum kane ka jingpynrung kam ba kyrpang khamtam lei lei na ka bynta ki samla kiba sah ha khappud.
“Ngi kyrpand ban pynlong biang ïa kane ka jingpynrung kam kyrpang ha ki post kiba lait bad pynlong ruh ïa ki jingbatai bad hikai ïa ki samla halor kane ka jingpynrungkam khnang ba kin sngewthuh ban ïoh rungkam ha ka tnad BSF kyrpang lei lei ïa kito kiba sah ha khappud namar ki tip bha ïa ki bynta khappud jongka ri” ong biang ka HITO.
Kane ka jingpynrung kam ha ka tnad BSF ym tang ba ka aikam bad bsa ja ïa ki samla hynrei ki samla na kane ka jylla ruh kin ïoh bynta ban ai ka jingshakri na ka bynta ban ïada ïa ka ri bad ka jaidbynriew. Namar ka jingjrong ki bynta khappud ka India bad ka Bangladesh ka buh ha ka jingma haba kiwei ki ïoh rung shapoh ka ri na ki bynta khappud.
Ka seng ka la kam ruh ba ka la ïoh ban bat bad aiti sha ki pulit la arsien ïa ki khar Bangladesh kawei sawngut sha ki pulit ka Sadar Police Station ha u 2025 bad kawei pat 3 ngut ki Khar Bangladesh sha ka Mawryngkneng Police Station.
Halor kane ka HITO ka kyrpad ia u IG ki BSF ba un shim khia ban ïakren bad ka sorkar pdeng namar ka kam ïada khappud bad ka ïoh kam ïoh jam ki ïa ïaid ryngkat ryngkat.
